|
طلعت هبركه دبركه للديسه بتبوك تقرير مفصل بالكامل السلام عليكم ورحمة الله وبركاته هذا تقرير عن رحلتي انا وخوي ابو سوسن في يوم الخميس الموافق 29/8/1430هـ طبعا الطلعه ماكانت بالحسبان ولا شي دق علي ابو سوسن قالي ابو جود وينك قلت بالبيت قالي وش رايك تجيني تغدا معي على كبسة حاشي قلت والله ماهي شينه خلاص اوكي بجيك المهم رحنا وتغدينا هذيك الكبسه الي ما ودك تقوم من الصحن بصراحه كبسه بالراس على قولنا من زين الطبخه والله ماشالله تبارك الله المهم قال وش رايك نطلع الديسه تفاجئت بالخبر وجلست اقول بخاطري وش عنده هذا بيطلعنا والليله يمكن رمضان مهبول هذا بيطلعنا وطبعا يكلمني واانا بحاله شبعان بعد الكبسه ماني قادر اتنفس طبعا منسدح ومترنح و منبشم ما اشوف الدرب وهذا يبي يطلعني الحين وبالقايله وجالس اللحين افكر وش ارد عليه وناداني بصوت عالي ابو جود تطلع ولا لا قلت طيب نطلع قال قم هنا صار الموقف صعب جدا تخيلو شبعان ودايخ ومنسدح وش اسوي قلتله خلاص رح وكمل اغراضك وعزبتك وتعال قال قم كل شي جاهز انا لله وانا اليه راجعون قلت وش تبي انت رروح لا اصكك بالجوال على جبهتك اصبر شوي انا دايخ خلني اجمع انفاسي وتوقعو وش سوى بكل نذاله قام وسحبني برجلي الين الباب وش سويت جلست اضحك وبكل قوه اول مره احس اني عربيه خضره تنسحب هههههههههههههههههههههههههههههههههههههههه المهم ركبنا السياره وتوكلنا على الله ******************* ******************** وهذي مقدمه عن الديسه قد توفرت في الديسة مقومات الجذب السياحي، فاجتمع فيها جمال الطبيعة وهي من أهم التفاصيل التي تجعل من البلد، أي بلد، مشهدًا من مشاهد السياحة والحضارة والشهرة فاعتدال الجو زاد رغبة كل من يأتي إليها أن يطول به المقام بين جنباتها وكذلك وجود جبال شاهقة الارتفاع مكسوة بالأشجار، ووجود التكوينات الصخرية الخلابة تعطي الزائر فرصة مشاهدة هذه المناظر الطبيعية، حيث الجبال المخروطية ذات الأشكال الجمالية المتعددة والهضاب المستديرة الحمراء وهذه التكوينات الجبلية أعطت المنطقة تميزاً خاصاً،بتشكلها المميز الذي يؤهلها أن تكون من أجمل بقاع الدنيا إذا هي منطقة سياحية واعدة، متى ما توفرت لها مقومات السياحة من مرافق وفنادق ونظافة فقد لاحظت كثرة الزبائل ومخلفات المتنزهين ملقاةً في هذا الوادي الجميل .. كما أن الديسة بلدة أثرية أيضا إذ يوجد فيها واجهات مقابر نبطية منحوتة بالصخر غير مكتملة ، وبقايا جدران لمباني سكنية ، وهي مسورة من قبل هيئة الآثار ولذلك لم أستطع تصوريرها ولكني وجدت كثيرا من الكتابات النبطية والعربية المكتوبة بالخط الكوفي مما سأعرض بعض ما وجدته هناك ، كما توجد بعض المواقع الأثرية الأخرى لبقايا مستوطنات سكنية مثل المشيرف وموقع السخنة والمسكونة . قال الجاسر : الديسة : واد من فروع وادي دامة ، بمنطقة ظبا ، فيه مياه وزراعة ، وسكانه الحويطات – حويطات التهم - إذاً موضوعي هذا عن موقع مهيأ لأن يكون موقعا سياحيا في منطقه تبوك .موضوعنا عن الديسة ووادي دامة والذي يعرف قديما بوادي أدامَى إنه عن الديسة تلك القرية الهادئه والتي تبعد عن مدينه تبوك حوالي 200 كم وترتفع عن سطح البحر حوالي 400م مما يعطيها الجو الدافىء شتاء وشبه المعتدل صيفا وتتميز هذه القرية بالزراعة التي من أشهر محاصيلها الخضراوات والفواكه ومن أشهرالفواكه المانجا الذي لا يكاد يوجد له شبيه وهذا الوادي جنة بمياهه الجارية وغاباته الطبيعية وإليكم بعض الصور من هناك .. ************* ************* المهم نكمل لكم القصه والجو كان في قمة الروعه صراحه وحنا بالسياره اخذت صورة للغيوم كانت بشكل جميل جدا وواصلنا طريقنا للديسه ونتفاجاء وحنا مسرعين سرعه خياليه وكنا نمشي 80 KM بالساعه الى وهذيك البعارين واتمسك بقوه انا واصرخ بصوت عالي احذر امامك بعران وعلى طول هو تفادى الموقف ورفع رجله عن البنزين وهدت السياره طبيعي لاننا ماكنا مسرعين وقالي طلع السلاح قلت لا فكنا حرام قال اقولك طلع السلاح لافقع وجهك قلت طيب قال طلع السلاح وصور البعارين طبعا السلاح الكميرا الي معي وانا اوجه الكميرا عليهم واصكه من بين عيونه بالصوره هذي المهم مشينا الين انقطع الزفلت وطبينا الردميه ( خط ترابي صحرواي للي مايعرف الردميه ) ودوس ومشي ودخلنا الديسه من بين الجبال ياللهول هنا تبدا الافلام والله وندخل الديسه وانامتعلق فوق الجيب حق ابو سوسن http://www.j000d.com/vb/images/smilies/sm5.gif ودايخ من البطناج والدرج ( مطبات بريه ) وبترككم الان مع مجموعه للصور المصوره للديسه وزي متشوفون بالصوره سبحان الله تضاريس الجبال كيف غريبه وهنا يبان مهنا كثرة النخيل المتشابك ومنضره الرائع وهذي ورده اهديها لجميع اعضاء منتدى مكشات واقول لعيونك هذي الورده والتقرير هذا وهنا تبين الصوره معنا الطبيعه وكثافة الاشجار والمياه الجاريه قولو سبحان الله لاتخلص المويه الي هناك وهنا صوره غريبه لطائر الهدهد المنقرض اقول لاتجلس تنصب على الناس هدهد مين انت هذا هدهد ايه يعني طير وانت اي شي يطير تسميه هدهد وش تبي انت بكفي ياخي حتى الزرافه انا اسميها النمر الوردي وش تبي بكيفي طيب اكتب وخلنا نقرا كمل موضوعك ماني مكمل خلاص بحذف الموضوع موضوعي وحر وش دخلك انت لالا تعال والله اسف طيب لاعاد تعوده وزي ماذكرت سابقا سبحان الله التضاريس الغريبه ويكثر في وادي الديسه الحبق ( مشابه لنعناع) وبرائحته التي تعطر المكان وهنا صورة الخيول العربيه الاصيله وهي تركض هههههههههههههههه اقول انت منت صاحي لا انت ولا خيولك هذا خيول اجل بعارين ايه بعارين الحمد الله والشكر هذي بعارين انت حول هذي خيول يامخ طيب طيب واصل ايه بواصل بنتضرك اجل وهذي صوره مصورها تعكس الشكل بالماء والشكل هو شكل يبان فيه الشي فيسمى شكل والله انك ذكي ماشالله الحين انا عرفت منهو هبركه الله يخليك اقول ضف وجهك لاصكك بعلبة الببسي بجبهتك ليه وش سوي فضحتنا الله يفضحك بوصفك فشلتنا وهنا صوره من فوق تبين التضاريس كما ترون من خضره وحركات بركات سكنات عجلات وهنا لقينا نحم ( بطه ) وهي جالسه تبرد من الحر وصكيته بصوره قلت وين تفوت هذي لازم اصورها لعيون منتدى مكشات الغالي وهنا زي متشوفون المنضر الخلاب بجمال الطبيعه هذي حياتي بربكان اقول سقها بس ولا تغبر الا بغبر وبدفنك بعد وهنا منضر للغروب كان جميلا جدا بين هذه الجبال الشاهقه وتتكلم الصوره لكم وهنا اعتبرها اجمل صوره لقطتها في حياتي بالفعل صوره شدتني بجمالها وطريقة لقطتها كيف لقطت هذي الصوره وقفنا قبل المغيب عند بير وجالسين نتوضى لاداء صلاة المغرب فلاحضت هذا الطائر الي مدري وش اسمه بس يمكن صقر صغير كان ياتي ويشرب الماء بطريقه سريعه وهو طائر قلت لازم القط صور له فذهب الى بركة الماء الذي كان يشرب منها الطائر وهو طائر وبسرعه وجلست له قلت لازم اصيده بصوره وفعلا قدرني الله على التقاط هذي الصوره ولله الحمد والماء بين عكسية الطائر وطلعت صوره جميله والحمد الله وهنا انتهينا من اعداد تقرير رحلتي انا هبركه دبركه ( ابو جود ) واخوي ابوسوسن طبعا الكميرا الي استخدمت بالتصوير هي من نوع canon G10 وفي النهايه ترقبو تقريرنا المقبل باذن الله لرحله ثانيه معد التقرير بالكامل اخوكم هبركه دبركه والسلام عليكم وتم نقل التقرير ليعم بالفائده للعموم |
| الساعة الآن 01:11 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir