مسكين منهو لاتحن جيك شربيت=وامسى عليه الليل والراس مبهوت
تدروخ وشنقل على مدخل البيت=ودلا يجر بخافت حليقه الصوت
شافوه خلانه يظنونه الميت=غدا طريحن كنه بساط مشيوت
تنادوا الجيران باعلا التصاويت=تسارعوا للدار والجار محلوت
لقوه ينخر مثل شخر الخراتيت=قالوا لعله عقب الافطار منحوت
قاموا وجابوا له صعوطن وحلتيت=وافصوص تومن مع دوا كبدة الحوت
واحموا له المخطر ورشوه بافليت=وانحاس من بين الملا صار مغموت
صرخ عليهم قال انا زنت واشويت=يا ناس فكوني ترا جاني الموت
وانحاش للشارع سواة العفاريت=يدور بالحاره ويرقى بكبوت
يلاطفونه هيه كيف انت وامسيت=تعال وانت اليوم شاطر وكتكوت
قال ابعدوا عني تراني تعافيت=ما بي بلا مير البلا جركل التوت
قالوا لزوم انك بمستوصف تبيت=والا على القاري قبل يمضي الفوت
تحاشقوه وصبوا بحلقه الزيت=رشوا على عينه لقاحن وسنوت
ودلا يزاوع والمناخر مفاليت=شالوه بدينا وغطوه بابشوت
خلوه صقعه عقب زين التواليت=ودلا ينادي يا عرب هاتوا سبوت
لعلي اهرب عن عيون الشماميت=واعيش باجبال الخلا شرق بيروت
تناول العجرا لهم صار عنتيت=بدا يصك الروس يلحقها بالبوت
مره يغوّلهم ومرات تحليت=لين اهربوا عن شر من كان مكبوت
هذي نهاية واحدن ذاع له صيت=بالغ بشرب التوت والعقل مسلوت