منتدى استراحات زايد - سالفة المرقوق من اخوكم راعي العجراء

السلام عليكم ورحمة الله وبركاته
حي الله ربعنا كل باسمه والله يسعد ايامك بالمسرات
كل عام وانتم بخير وصحه وسلامه
بعد انقطاع طويل نعود اليكم بهذه السالفه
وارجو ان تحوز على رضاكم والله يقدرني على اسعادكم بهذه السالفه حيث ان الدميجه ماعادها على خبركم راحت مع خبر كان واخواتها واعلنت عنها بالصحف والوايت سب ارسله ولدي للبحث عنها وقالوا شهود اعيان ان دميجك شفنها ذابحها المشق ومتشطبةٍ عراقيبها من المشي تدور على اخوات كان في جزر الفوكلند في شمال افريقيا اللاتينيه بالفلبين ويقولون لقوها ذابحها العطش واسقوها عصير منقا قها وصحت ودلت تسولف عليهم
اعود الى السالفه
يوم كنت صغير وانا ذهين عاد انتم خابرين ذهانة راع العجراء ماتروح بعيد دزه تاطى رجلك
المهم اذكر على وقت بيوت الطيبين بيوت الطين الجيران كانوا مع بعض مثل الاهل هذا يطعم هذا وهذا يقضي حوايج هذا ومن هالقبيل
قالت الوالده لخوي اللي اصغر من خذااا هالطعمه ودها لبيت جيراننا فلان مدري هو مرقوق اومطازيز الوكاد كلهن مثل بعض عجين عليه ماء وقرعه صفراء لاكيماوي ولا شي تلق من الصفار تقل اشارة كرسيدا واخذ القدر اخوي واعطاه لجيرننا الثانين ورجع يدودل راسه ماشاءالله عليه وصل المرسول لا وبعد يغني وحالق راسه موس والظاهر اللي حالقه نجار بالفاره ماهوب حلاق ماشعه مشع لاشفت اذنه ولاها تقل حلق صميل من طولها ولاشفت علباته تقول عفريته 7 طن مجيمة من الصداء المهم يدخل عند الولده الله يرحمها وهو يقول يمه تسلم عليك ام فلان وتقول الله يجزاكي خير جت بوقتها والوقت كان وقت غداء قالت الوالده منهي امه اللي وديت لها المرقوق قال ام فلان قالت انا قايلةٍ لك وده لبيت افلان يالدبشه وتروح تعطيه افلان ياليتي مروحته مع ابوجلبمو واخوكم راعي العجراء يتسمع الكلام وفرح انه تهاوش اخوي وتمدح فيني وانا انس من عندها وهي ماتدري مسوي نفسي ذهين عقب المدح واروح اطق على البيت اللي اخذوا المرقوق مدري المطازيز واقول تسلم عليكم امي وتقول ان الطعمه ماهيب لكم جتكم بالغلط الطعمه جابها لكم وهي لجيراننا الثانين بيت فلان عاطونيها وديها لهم دور الحريمه ولاها ماتشوف من الحياء ماهو من من امي
ولاهم ماكلينها مع غداهم قالت رح وسلم على امك وقلها بعدين اعلمها قلت مانيب رايح لما تعطينياها اوديها قالت والله البلشه ياوليدي ااكلناه رح وانا لاشفت امك ابعلمها وانا اجيك راجع للوالده واصوت لها يمه ويني عندي نفسي جايب العيد واصوت لها يوم ردت قلتلها تراي رحت لبيت افلان اخذ منهم المطازيز علشان اوديه لبيت افلان ولقيتهم انهم ماكلينه قالت حسبي الله ونعم الوكيل انا قايلة لك رح جبها يوم صار وجه امي تقلل نجم سهيل يعطي الوان كل ثانيه لون وتمسك راسها يامل الجنه الحين قلي وين اودي وجهي منها تحسبني مرسلتك لها وضاق صدرها من الفشيله وانا احسب نفسي اني فازع لها مسوي نفسي سوبرمان وهي تمصع اذني لما صارت كبر البيز ووحده اطول من الثانيه
انتهت السالفه وسبحانك اللهم وبحمدك لا اله الا انت استغفرك اللهم واتوب اليك