السلام عليكم ورحمة الله وبركاته
صباح الخير
أتوقع هذا الوقت المناسب لموضوعي وذلك لقلة الأجواء الممطره لتجنب التشكيك بالمقاصد والفهم الخاطئ
ومن باب التوضيح هذي مخصصه لفئه كثرت الوقت هذا بتحليلها الحالات قادمه للامطار بتحديدها بالساعه والمكان وهم ليسو من هواة هذا الشان لجذب عواطف الناس على ماتحب للشهره وغيرها
وأما أخويانا هنا بالمنتدى محشومين عنهم
بالعكس الله يبيض وجيههم يبشّرونا بخير ويبررون أنه توقع لاأكثر ولاأقل هذا ماحبيت أوصّل من معلومه.


يامـرسـل أخبـار المطر بالمقابيل
ومـحدد وقـوعـه وحـاسب دخـوله

ومن مرصده تنشر صور بالتفاصيل
والغيـث كـنـّك واثقـنٍ فـي حلـوله

لـك مامضى مخطي جميع التـآويل
غـاوي مـع الغـاويـن فيمـا تـقـوله

كثـرو هـل الـرأي العـوج والمهابيل
كلّن هـوى نفسـه حسبـهـا رجـوله

اللي صـنع مـقيـاسهـا والتـحـالـيل
عـلـم المطـر بالغيب عـيّا يطـوله

الغيـب بالمقبـل لـه الـرازق يكـيل
الـوالـي الـنـافـع عـليـم بـ نـزوله

يسـوقه لـديره وعـن ديـره يحـيل
سبحان مـن ساق السحاب بـ حموله

سبحان مـن سخّرلـه الـريـح تعليل
على الصبأ ينشئ بـخرجنٍ تحـوله

وأزيب جنـوب تسـوق مـزنٍ هماليل
نسنـاسهـا يبـنـي حقـاقـاً هطـوله

وبأمره شمال الريح يقطب كما الليل
كـاسر على القبله صدوق بـ شعوله

وسبحـانـه الغـربي جعلها مـراسيل
لـ ديـره تسـوقـه تسـاكـب ثـعـوله

سبحـانـه المعطـي بالأرزاق ويشيل
والـخيـر بأنـواعـه تـعـادل شمـوله

سبحـان مـن صـاغ العقل للمعـاديل
والنـفـس دونـه للعـواطف مـيـوله

أحـدن على عقله عن الحق مايميل
مقدي بـه العقل الصويب بـ حلوله

مـاخالط بدربه هـوى نفس تظليل
فـي سوقنا نـادر لنـا أغلى عمـوله

أن قـال فـاد مجنّب الـقـال والقـيل
نفسه عزيـزه لـك يجيب الكمـوله

ماهـو مـن اللي شهـوة لعـابه تسيل
فـي كـل وادي لـه تجـارب وجـوله

تتعب علـى نفعه وتلقى الغـرابيل
بالشين نفسه حكمها بـك عجـوله

تسايسه فـي خوتـنٍ تقطع الحـيل
ينسـى خـطـاه ومنّته فـي فعـوله

لكـن حياتك صـفـوها دون تنكـيل
لاتحـط (شـي) إلا بمكانـة قبـوله

محبكم وأخيكم الصغير/علي الذبياني