|
القرش في خليج سلمان-وحيوان متنكر السلام عليكم ورحمة الله وبركاته الفترة اللي راحت نزلت فيها نزلات سنوركل كثير طبعا كل شوية أشوف أشياء وأشياء في البحر وأعرف عنه أكثر وأكثر طبعا مع الحرص وأخذ الحيطة والحذر وعرفنا أماكن اختباء السمك في الليل بصراحة السنوركل في الليل أرجل كثير من النهار بالنسبة للصيد طبعا نرجع لموضوعنا في نزلنا من نزلاتي الليلية وأنا فوق الكسارة ومتوجه على الحيد شفت سمكة عقام كبيرة نسبيا سلطت عليها النور لقيتها طويلة زيادة بالنسبة لعقام وعريضة قلت شكلها شاقة خلليني أحتاط وانتبه لها مزبوط لا تكون جيعانة وخارجة تطلب حرش سلطت النور زيادة والا شفت الصورة كاملة لا شاقة ولا عقام قرش باشا وأنا متأكد من اللي شفته كان القرش لونين من تحت أبيض ومن فوق لون غامق طبعا اللي سبب ان في البداية ظنيته عقام ولا شاقة انا أول شي شفت اللون الأبيض اللي تحت وأنف القرش كان مدبب نوعا ما وسط جسمه عند منطقة الزعانف هي المنطقة الأضخم والأسمن في جسمه طبعا قلت خلليني مثل ما أنا أراقبه بس ومسلط عليه المسدس والكشاف عشان اذا التف ناحيتي ما أعرف اتفاهم معاه حيلاقي المسدس في خشمه وخليه يسحبه معاه فضلت أراقبه في هدوء عشان لا يحس بحركتي ولا أغريه بحركة ولا شي انه يقعد في المكان - أبغاه يمشي لأنه هو مو من المنطقة بس شكلي معدي ولا مضيع الطريق وعلى فكرة تراه كان ضخم ضخم ((تراني لابس عدسات طبية- أشوف الأسماك أكبر من غيري)) الحجم اللي شفته تحت الموية يقارب حجم سيارة ياريس طبعا كان ماشي في خط مستقيم بانحناءات هادية وعيونه واضحة الين بعيد واختفى عني وبعد رجعت لصاحبي اللي معايا وقلت ارجع الان واهدا شوية في قرش في المنطقة خلينا ننتظر شوية عشان يبعد لأن المنطقة هذي أرحامي يغوصوا فيها من زمان وعارفينها مزبوط ومتأكدين انه ما فيها قروش احيانا(نادرا) تجيها قروش حيد صغيرة --اذا كان رحيمي الوحش في البحر يطلعها تتعرف على البر-- عشان كذا لما قلتلهم على اللي شفته ما أحد صدقني وقالوا مستحييييييييييييييييييييييييييييييييل يجي قرش بالوصف هذا هنا --بس أنا عارف اللي شفته ومتأكد منه اللي يصدق يصدق واللي ما يصدق عسى عمره ما صدق وبعدها اختفى القرش ولا شمينا ريحته ونزلوا الغواصين دوروا عليه وصادو سمك ولا أحد منهم شافه --------------------------------------------------- في نزلة ثانية من مكان ثاني كثيرة فيه المنطقة الضحلة والصخور المرجانية شفت حيوان بحري متنكر بهيئة صخرة مرجان وعليها قواقع صغيرة ((اللي تلاقوها على الصخور)) وله اطراف في كل طرف لواقط تشبه لواقط المرجان حتى اني قلت في نفسي ايش هذا ؟ ابو جلمبو شايل حجر أول مرة أشوف هذا الشكل اذا في واحد منكم يعرف عنه شي أرجو انكم تفيدوني وانا قاعد أدور صوره في النت لعلي ألاقي أحد حاطت له صورة أحلى ما في الموضوع انه وقف وقعد يتفرج علي نظرة كلها فضول --بصراحة انبسطت على نظراته البريئة-- هذا ونراكم في مواضيع أخرى شكرا لكم على المتابعة :o |
| الساعة الآن 10:25 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir