اصحاب اليوكن..(( الحل الاكيد في مشاكل الدبل العنيد))
 

السلام عليكم جميعااا...
بادخل في الموضوع على طول لاني عانيت مثل ما عانا الكثير منكم من مشاكل الدبل...
عندي يوكن 2005 دبل المشكله هي:-
لنبات الدبل تولع على كيفها مره خفبف ومره ثقيل ومره اوتوماتك..احيانا اشغل السياره القااه على الدبل الثقيل واحيان القاها ماتولع خير شر والكلام هذا من يمكن 7شهور وانا مجمد الوضع قلت الى ان يخرب مره وحده وافضاله.
المهم جيت الاسبوع اللي راح واشغل السياره الصباح والقااا طويل العمر(اليوكن) معلق على الدبل الثقيل ومو راضي يفك واللنبات كلهااا طافيه يعني مافيه تحكم..عدل بدل تكفاا ياطويل العمر وراي دوام ابد مو راضي يفك(الظاهر انه شافني مجمده ولا صيانه ولا هم يحزنون)) المهم دبرت عمري ورجعت للموتر العصر والف وادور واطيحلكم على ورشه كلهم فلبينين وكانو اساسا شغالين في الجميح بناء على شهايد شفتها معلقه بمكتبهم..
طبعا قبل ما اروحلهم مريت كذا ورشه كل تفلسف اللي يقول القير انعدم واللي يقول الدبل انتهى واللي يقول باخذ عليك 3 الاف ومن هالخرطي.
والله واجي عن طوال الاعمر ابو فلب....
طلعت المشكله قطعه صغيره بلاستيكيه فيها راسين نحاس وضيفتها توصل بين لوحة التحكم وبين الاجزاء الميكانيكيه فقط ((انكمرسنسر)قيمتها 300 ريال وشغلها ما اخذ نص ساعه غيرتها والحمد لله كل شي تمام.
وانصح اي واحد عنده موتر الجميح جديد وهو بالشرقيه لا تفوته هالورشه والله ماهي دعايه لكن ناس فلبينيين متخصصين بسيارات الجميح وعندهم قطع الغيار.
عموما اي شخص عنده مشكله بسيارته يشرحها هنا وباروح اس\اله لاني باسوي تشييك كامل على السياره .
تحياتي للجميع والورشه بالجبيل الصناعيه
انشاء الله باصور لكم القطعه وانزلها بالمنتدى