منتدى استراحات زايد - طقطقة في مكينة التاهو ؟ اصوت صبابات الزيت ؟ لمشكلة مع الحلول .

السلام عليكم ورحمة الله وبركاتة .
اولا احب اشكر جميع اعضاء مكشات لاني كل مابحثت عن عطل في السيارة لقيت مكشات اول موقع القى فية الحلول
وهذا الشيء خلاني اسجل في المنتدى .
عشان اذا بلشت شاورتكم :Dوان استفدت افدتكم
مالكم بالطويلة

يوم من الايام كنت واقف والموتر شغال وكنت عند مطعم
واسمع صوت ( تك تك تك تك تك ) توقعت انه من المطعم من ثلاجاتهم ولا المواتر الي قدامي لاني كنت في طلبات السيارات
يوم عشقت D والصوت كنة تغير ! شكيت انه موتري
وافتح الدريشة وافضي القير وادوس شوي واثر الصوت يزيد :eek:

للاسف ! طلع موتري
ويضيق صدري لان لي مواقف سيئة جدا مع الصناعية من ناحية النصب والاحتيال :mad:
بحثت عن المشكلة لقيت الكثير واجهو هالمشكلة وكل واحد يعطيك حلة الي يقول غيرت جلدة الطرمبة والي يقول غيرت الطرمبة المهم ارخص حل يكلفك 900 ريال اذا مالعب في موترك الميكانكي بعد
لاكن استغربت من شي يوم دعست وصل RPM الين 4 ( هذا حدة :p)
راح الصوت
يومين ورجع ثانية وادوس وراح واشد رحالي الى الصناعية حيث العيش للاقوى مريت على باكستاني قال بس ! هذا لاز توضيب مافيها كلام !
يامودير كيف توضيب مرة وحدة :confused:! قال كثيير جمس يجي كذا انا صلح مافي خوف
قال سيارة حق كفيل سوي كذا بعدين انا توضيب . قلت فمان الله
ومريت ورش كثيرة . اغلبهم قالو بنفك المكينة . قلت ابطت عظم :D
يازين هالصوت دام فيها فك !
مريت على هندي باين انه ولد حلال ومطوع وشغلة مرتب
الي اعجبني فية اني عطيتة مشكلتي وسمعتة صوتية كنت مسجلها للصوت
قال هذي من صبابات الزيت او مدري والله وش قال بس ماقعد يهذري مثل الباقين ويقول لازم فك مكينة وشنبر ومدري وش والبلوف متكسرة
قال لاتخاف مشكلتك بسيطة
اول شي غير زيت مع سيفون ! يوم قالها تذكرت اني ماشي على السيارة 200 الف وانا احط زيت 10-30
واخر مرة غيرت بترومين اي ون الذهبي 5-30
قلت برجعة لزيتة الاول لعلة يزين .
قلت طيب ولو مازان ؟ قال غير طرمبة
قلت لو مازان ؟ قال فك مكينة
شغلت ومشيت . من بكرى طقيت زيت وسيفون
وزانت الامور ولله الحمد :good2:
الصوت راح صار كل مامشيت 4000-5000 يجي
واذا جا ادوس بنزين عشان يروح واغير الزيت ويختفي الين 4000 الجاية
اذا غيرت الزيت وماراح الصوت جرب الحلول الثانية . لاكن خل اخر حلولك فك المكينة . لانها ماراح ترجع زي قبل

المستفاد من هالموضوع مهما كانت مشكلتك ابدأ بارخص الحلول . واستشر اهل الخبرة وابحث في الانترنت
لاينلعب عليك في الصغيرة والكبيرة . ولاتخلي موترك عند ورشة وانت ماتدري وش يزين
وكل مشكلة باذن الله تمر علي واحلها بطرحها . وارجو منكم الدعاء .