الاغاني في زمان الطيبين السلام عليكم ورحمة الله وبركاته نعود بكم بهذه السالفه الى ماضينا الجميل او كما تحبون ان تطلقوا عليه بماضي الطيبين اتذكر بعض الاغنيات التي كنا نستمع اليها ولانعرف معانيها لختلاف اللهجات بالدول العربيه لقلة الاختلاط بالجنسيات الاخرى ومنها اغنيه كانت تغناء اعتقد انها لنجاح سلام مدري عاد هي لبنانيه او سوريه اللي تقول ياغزيل ميل = ياغزيل ميل بعملك تبوله حنا وش يعرفنا بالتبوله ذاك الحين نحسبها تقول بعملك بوله عاد حنا نقول كفوك انت وياها امحق حب والاغنيه الثانيه لماهر العطار كما اعتقد يامازقزق الامري على ورق الليمون وهو يقولها بلهجته زازا الامري ولكن المذيع يقول اغنية زقزق الامري عاد حنا على نياتنا نقول وهو قاعد يعد ورق الليمون اللي سوى العصفور عليها سواته ماندري انه يقول يا ماغرد القمري على غصن الليمون ماعرفنا قصده الابعد خمسين سنه بعد اعادة برجمه الربع قيقا . الاغنيه الثالثه مهاء صبري تقول جيب القول على الرائد ... جيب القول خلك هداف ان كنت ونقا وسنترها .... يالله تقدم اصحا اتخاف عاد حنا نقول ياهي متسلطه على نادي الرائد وش محرق رزها ماندري انها تقول جيب القول على الرايق ... جيب القول خلك هداف وهي من كلمات طاهر زمخشري رحمه الله لنادي الوحده الاغنيه الرابعه اللي يقول افرش منديلك عالرملى .... وتعال احكيلك على الرملى عاد حنا نقول وش هالمنديل اللي بيقعدون عليه وبياخذهم كلهم مامعهم بساط واخيرا اكتشفنا انه جلال اومسفع هذا اللي حنا نعرفه ومن الاشياء الاخرى في زمن الطيبين كان في كتاب الهجاء للسنه الثانيه او الثالثه الابتدائي قصة لاترمي قشر الموز وذاك الوقت مانعرف الموز وش هو من لحيه عاد الطالب يسال الاستاذ يقول استاذ وش هو الموز حتى الاساتذ مايعرفه وانحرج مع الطالب ولا يبغى يقول اني ماعرفه يرد الاستاذ للطالب يقول للطالب الخط من عنوانه مادام انه يقول لاترمي قشر الموز فهذا دليل انه طير قد يكون محرم قتله وبعد مرور الزمن وعرفنا بعض الكلمات في الاغاني وطربنا لها وخاصه الاغاني العاطفيه ذلك الوقت ايام شبابنا رجعنا الى اسوا الكلمات للاغاني اغاني هشك بشك مثل اغنية ( بحبك ياحما ...؟ ) والثانيه ( اركب الحنتور واتحنتر) الله يرحم ايام زمان واحسن شي يوم تركنا الاستماع الى الاغاني جتنا مثل هالاغاني بس العجب اللي يستمعون لها ويهزهزون بروسهم انسجام مع الاغنيه طربن وانسجاما وفي الختام لااله الا انت استغفرك اللهم واتوب اليك مع تحيات اخيكم راعي العجراء برلين الشرقيه ولاية طوكيو بالفلبين |
الساعة الآن 08:44 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir