منتدى استراحات زايد - تكفون فزعتكم يا أصيل حجازي وكل من له خبرة في الباترول

أخواني جميعا بدون تخصيص السلام عليكم ورحمة الله وبركاته والله يسعدكم ويسعد أوقاتكم ومبارك عليكم مطر الوسم ياأهل الديار الممطورة وعساها متبوعة وعسى المولى يجعلها عامة وشاملة
يا أخوان أنا عندي مشكلة في جيبي الباترول 94 جابتلي الصمرقع في راسي عسى روسكم سالمة والمشكلة بإختصار ( رجة في السيارة من أسفل ) تحسها تهتز من تحت كأنك ماشي في بطانيج خفيفة وتحسها عند مواطي الأرجل تبدأ عند الممشى من 85 إلى 90 وبعدين تختفي وترجع إذا وصلت السرعة 100 / 110 وبصراحة تعبت منها وكل مهندس يفتي من راسة وكرياسه وكلهم الظاهر تعلموا في سيارتي غيرت الكفرات وغيرت جنوطها ورصصتها - غيرت جلود أعمدة التوازن والمقصات - ركبت عمود كردان وعمود الدبل - غيرت كراسي المكينة والجيربوكس لكن أعوذ بالله ما نفع شي ولا زالت هالمشكلة شاغلتني ومشغلتني والله كرهتني في السيارة مدري عين ناضلتها ولا قرادة حظ
وأنا الحين مثل ما يقولون أخوانا المصارية ( غلب حماري ) أكرمكم الله فتكفون يالربع بصفة عامة ويا أخ أصيل بصفة خاصة تكفون دلوني إللي مرت عليه المشكلة ويعرف لها حل لا يبخل علي إنتم تقدرون وأنا أستاهل وأعذروني عن متابعة ردودكم أول بأول لأني ما عندي وقت للنت إلا بالليل فقط ومتأخر وإن شاء الله أشوف ردودكم وأرد عليكم وأستفيد منها وللمعلومية السيارة كان مركب عليها فرارات وفكيتها منها يعني رجعتها كما كانت والله يحفظكم