السلام عليكم ورحمه الله وبركاته

هلا بالغالين ومرحبا ومسهلا كلن بسمه

انتم خابرين منول كل بيت فيه بقره لانها هي السوبرماركت :D
كلش منها الحليب واللبن والزبد والروب او الزبادي
المهم عندنا بقره جرسيه ههههههههههه ذيك الي تجي وش كبرها بس رجلينها صغيرات
والمهم بعد انها غتنا تثاغي طول الليل ماخلتنا نرقد
ونتم خابرين وشي تبي جزر بلا جزر مار ماعندها في احد الا بغت الثور
وهي تثاغي مثل الي تقول ودوني لبونا ودوني لبونا تقصد الثور :p

قالي ابوي ياملا الفردوس يالله ياسحاب نبي نربط البقره ونوديها للثور عاد بقر شقراء كلهن رجلهن ثور في مزرعه اسمها الحميضيه جنب البيوت مهيب بعيده
ويربطها ابوي بحبل يجي له خمسه امتار او اكثر وبوي يقولي جودها ونا ابوك لياها تنطلق وقوم من زود الحرص وربط الحبل في يدي كله اخاف انها تنحاش

انتم تسمعون بشوط البقره ههههههههههههههههه
وهي تصير مربوطه طول السنه ولا انطلقت من رباطها اللهم عافنا تنطلق وهي رافعه ذنبها بسرع شي
ويوم فتح ابوي الباب حق الحوش ونحن نبي نزف البقره مثل العروس :D
وهي شافت الباب مفتوح ولا ماشافته وهي تنطلق ونا وراها اصلن الحبل مربوط في يدي وين ابا اروح ونا عاد عصقول يعني نحيف وهي الي تجرجرني ونا على بطني وغبرتي واصله السماء
وبوي يركض وراي وكل من شافني يركض وراي ونا صاير كني ثوب مافيه احد يعني قماش بس
وتزلطت سيقان سلوا هههههههه اعاني روحي
وتقطع ثوبي كله مني ولا وشوله اسوي عنتر عند ابوي وربط الحبل في يدي
وفي الاخير ونا بين الحيات والموت مسكوها رجال ويوم خذت نص ساعه وياصلني ابوي وهو يقولي عساك سالم قلت لا انا سحاب
وش سالم سالم تبن بوجه العدو حتا في راسي فلقه ويصب الدم

الثانيه يالغالين

فيه حمار في شقراء نسميه التبيس من طوله تصدقون ماجت ذا التسميه من عبث
تصدقون يركب عليه سبعه عيال من كبره ورفعه ذاك من سلالات عملاقه
لقيته في نخل همال في شقراء وهو واقف تحت ضلال نخله وهو الا شاف احد ينحاش
المهم مسكته وهو يعض بعد من زينه وزين خشته علشان يعض

ونا الي اركب عليه وصير في اخر ظهره علشان مايعضني من الذهانه فيني وذكر ذاك اليوم يوم جمعه ونحن الضحي المهم ركبت عليه ولا ماركبت عليه ونا الي اصر برجلي عليه يعني مافيه شي ينمسك فيه وهو الي ينطلق بي مع السكيك وركض ولا عاد اقوا اوقفه راسه بعيد عني ونا لاهي اخاف اطيح
ومن سكه الا سكه على سرعته ولا يرده الا سوق حليوه وهو السوق الرسم لشقراء ونتم خابرين السوق يوم الجمعه يصير مليان من الناس وهو الي يدخلبي على السوق وعزق السوق عزق هههههههههه
مغير تشوف الناس ينحاشون ونا مازلت اقاوم وحس بعض الشياب يقولون لي اقهره ياولد اقهره
وش اقهره انا اطول راسه علشان اقهره اخرو بس لا يتهبدكم :p

وبس قظت السالفه بعد ماصار في النهايه حادث شنيع وطحت من عليه

اذكر منول الحمير قبلهن ياطن قواطي وتدخل القواطي في رجليهن
ولا سمعتا مشيتهن على الزفلت كنه واحد لابس كعب

وسع الله قلوبكم وفرج همكم وسمح امركم وغفر لكم امين يارب العالمين