السلام عليكم ورحمه الله وبركاته

يالله انك تحييهم ولياحيا كثر وتنثر ولا تنثر تزبر :p
حيالله الغالين كبيركم وصغيركم ذكركم ونثاكم وعيدكم مبارك

تصدقون اني اوزع الطعم في الاضحى على حمار .آخذ طعمتين وكل وحده في يد وروح اعطيها اهلها وارجع اخذ ثنتين ثانيات واوديهن :D
ولا كنا نحطهن في كيس ولا شي ابد نوديهن كذا يمكن ينشب بعض شعر الحمار فيهن بس مهوب يخالف هماه لحم اسكت لا ياكلونك كلك

هذا ونا ماحطيت على ظهر الحمار وثاره يعني شي يوقي مقعدتي من دبره الحمار تراها توجع المقعده كنك جالس على حصات بس شباب مايهمنا

وحصلي موقف ما احسد عليه ..

بصراحه وانا على الحمار ومعي في كل يد طعمه يعني ما تمسكت الا برجليني
عصاقيل كنهن محاريث رماد واخلي الحمار يركض مانيب لعب وش الامريكان اللي يركبون خيول عندي ولا شي
المهم معي الطعم والحمار جايب سرعته ومريت من عند حريم واتميلح عندهن يعنني راكب حمار تراي صادق كني راكب كدلك هذا الي نقوله منول ههههههههه
وبعد ذا الحريم يوم شافني ونا على الحمار وقفن يتفكرن في البطولات كله منهن

وفجأة حصلت الكارثه
قام الحمار ينكر يعني يطامر مدري وش جايه او اني لامس شي برجلي ما دريت والله مدري
المهم طمره طمرتين والاي انا والطعم ساحين على الارض ما بقى ولا تراب ما اكلته واللحم صار كنه لبن اللي يبنون به الطين قالن الحريم بسم الله عليك بسم الله عليك
وانا من قو الفشله لقطت لحمي وانحشت كني سارقه واروح لمسقات شيحان
المكان اللي يتوضون فيه الناس واملا القرو ماء واغطس لحمي فيه وادلي اخبط باللحم على القرو ابي انظف اللحم من التراب
طلعت كني ذابح احد في المسقات
امتلت المسقات قطع لحم ودم
خل تميلحك عند الحريم ينفعك هههههههههه

والحمار من طحت من عليه وهو الي يجيب جهده منحاش امحق من فروسيه

وذكر بعدها بمده طويله كنت جالس انا ومعي كم واحد من العيال عند مسقات الصبخه والمسقات هي المكان الي يتوضون منه الناس - المهم ونحن جالسين ولا يوم مرن من عندنا هكا الحريم يمشن الله من زين الحكي اكيد يبي يمشن مهنب طايرات ههههههه ويوم جن الحريم من عندنا قالت وحده للثانيه وقفي وقفي تعاني الحرمه الثانيه الي معها وتقول لها مهوب ذيا الوليد الي طاح من على الحمار يوم الضحايا هكا الوقت وهن يناضرني ونا على طول اقول لا مهوب انا يمكن واحد غيري يكاد المريب ان يقول خذوني وهذا ترامثل يضرب في مثل ها المواقف - قالت وحده الا هو والله ان كني اشوفه هلحين هذي اذيناته الشتار بسم الله علي عارفين اذاني انهن شتار ههههه مار ممداني اطيح من على الحمار الا ونا منحاش وشلون بس لقطن ان اذاني شتار الله يغفر لهن ويرحمهن ووالدي وكل مسلم - وذكر بعد الا ذبحو الناس ضحاياهم تصير الشوارع او السكيك تخترش من الناس يعني يصير فيه حركه وكانت السيارات مهنب واجد شويات وكلن يمشي وفي يده قطعه لحم يروحون يودونهن او يوزعونهن ويسمونهن طعم او طعمه وذكر الا جا احد وطق الباب وعطانا طعمه نقوله اصبر اصبر لا تروح خذ طعمتك من عندنا وزي كذا منول وهلحين يجي الضحايا وتقضي الضحايا ما عطاك احد شي مدري ورا الناس معاد يطعمون احد الله يكفينا شر ها الدنيا ويعينا عليها واالاحرى بقبولها عند الله سبحانه انك توزعها وتطعم الناس منها
وذكر منول نسوي بالحم قفر يازينه زيناه مع المرقوق ولا مع اي شي ولا بالحاله :D
اذكر موووبطي فيه واحد قبل مخابيه مليانه دهن هههههههههههههه يحط فيهن قفر ويمشي وياكل
تصدقون ان انحن ناكل القفر وهو ماطبخ :p ناخذه من حبله الي هو معلق فيه وبلع ولا جانا من الله شر وهلحين لو تعطس يجيك ملع ولا فتق :D



ولا اقول في النهايه الا

سبحان الله وبحمده سبحان الله العظيم
عدد خلقه وزنه عرشه ورضا نفسه ومداد كلماته