ياللي عليكم نرسل ابيات واشعار@ردو علينا بالقصايد قصيده

من عقب ذكر المعتلي خير الاذكار@نبدي بها واللي نجيبه نجيده

هاض الخفوق وجاب من وسط القفار@شرايدن من بدع شعري تليده

مافي معانيها زياده وتكرار@تجي معانيها عذاب وفريده

ذعذع هوى غربي وحرك سنا النار@وتواقدت معها هجوسن جديده

يطريلي المقناص وايام السفار@مع الرجال اهل العلوم السديده

في ديرتن تلقى الحبارى لها دار@عن العماير والمناطق بعيده

ومعي احمرن ماهابها درج وطيار@عوقن لها لوهي عزوم وعنيده

مطلق عمد صافي نحر واف الشبار@دايم مطاليعه وكاد وبعيده

ماهوب تلابن ورى الخرب لاطار@وماعمرها قد جات فوقه طريده

ماطيع في حبه كثيرين الاشوار@ولو ساوموني فيه مافك قيده

وغلاه عندي ماتنزله الاسعار@وارعي الصقاره حب طيره رصيده