|
مصيبتي مع شركة صباغة وجبس، اسأل عن الشركة واحذر لا تتسرع ما يسمى بـ.......... ...................،، شركة ما تحط اعلاناتها في أي مكان لا وسيط ولا جريدة ولا بطيخ،، والزباين عليها مفل النمل على الحلاوة،، وما في مجال لزباين جدد،، حتى يوقفون ياخذون طلبات مدة شهر، بين فترة وثانية، عشان يخلصون اللي عندهم شوي... الشغل تمام، ومضبوط،، وعلى الموضة،،، وفي مهندس ديكور فلبيني يصمم الجبس على كيف كيفك، ويساعد في اختيار الألوان والتصاميم على الحائط،، وجداً متعاون.. بس هذا الوحيد الصادق في الشركة،، والباقي ناس كذابين بشكل ما تتصورونه،، يعني لما تروح يستقبلونك ويراوونك تصاميمهم ويعطونك القمر في يد والشمس في صبعة،، لكن لما يجي وقت الجد ما يمديك تتنفس وانته تلهث وراهم عشان يجون يشتغلون في البيت، يعني حالهم حال أي شركة كذب ونصب، قصدي شركة صباغة وجبس،، لازم تدفع 25 بالمائة من القيمة، ودفعت 1500 دينار مقدم للعمل في شهر فبراير، على أمل أن يبدأون الصباغة في شهر مايو قلنا ما في مشكلة ما دام المساح داخل وخارج البيت ما خلص،، في وقت. وأنا ركزت أكتب كل شي في العقد، عشان ما يلفون ويدورون حزة الشغل،، ويقولون هذا ما اتفقنا عليه،، ما عدا تاريخ البدء،، حاولت أخليه في العقد، قالت لي السكرتيرة الهندية أن بيعطونك ورقة ثانية للجدولة - الجبس والصباغة. -ما شاء الله عليهم- جدولة مرة وحدة، واجد دقيقين. وصل شهر مايو،، وضرب تلفونات لصاحب الشركة، ما يرد، نتصل للسكرتيرة ما في يدها لا حل ولا ربط، بس تقول بتخبر المعزب،، ولا في أي شي،، وصلنا نص شهر مايو،، خلص الشهر،، عصبنا على السكرتيرة، هاوشناها،، وهي مسكينة ما نصارخ عليها وتتنافض في كلامها،، واتصل بعد شهر واحد مسؤول الصباغة "بحراني" يا زعم بيسوي ليي حل،، اتضح أنه مدينة مترامية الأطراف في الكذب والمماطلة، والحكران،، يعني ما يرد على التلفون، ويسكر تلفونه إذا زادت التلفونات عليه،، وأنا ما أخليهم كل يوم من 5 إلى 8 تلفونات في اليوم،،، غير الطبات عليهم في المكتب.. لكن يا وجه استح، سو حل،،، الجماعة ما تستحي،، الكذب والمماطلة تمشي في اعروقهم،،،، صاحب الحلال والمسؤول عن الصباغة،، ما في فايدة،،، وصل شهر يونيو، خلص،،، ظل البيت واقف لمدة خمسة أشهر ما بدأوا لا جبس ولا صبغ، حتى برايمر ما سووا شي،، بعد اللتيا والتي، يجون يشتغلون في الجبس، يخلصونه في 10 أيام،، لكن الصباغة لوعوا جبدي،، أكثر من الجبس،، على ما يجيبون عمال، ويشتغلون اسبوع، يغيبون اسبوع، يشغلون يوم، وخمس أيام ما يجون،، يشغلون نص يوم، ويجفسونها شهر،، وهلما جرا،، ما صار لينا شغل إلا وياهم بس،،، ***** ملاحظة هامة،، ممكن تقدم بلاغ في هذه الحالة في الشرطة، بقضية نصب واحتيال، ويروح فيها صاحب الشركة حبس مدة أسبوع على ذمة التحقيق،،، ويحكم عليه لمدة شهر إلى ثلاثة أشهر، مع دفع غرامة،، يعني بدون ما توكل لا محامي ولا بطيخ،، بس بلاغ في الشرطة مع رصيد المقدم اللي عطوك إياه وخلاص،، يكفي***** لكن احنا البحارنة ما نحب المشاكل وخراب البيوت،،، ما لينا في مخافر الشرطة،، وما نروح المركز إلا إذا ضاعت البطاقة السكانية عشان نسوي بدل فاقد... المهم،،، المماطلات والتسويف والتأجيل معروف عن هذه الشركة،، والمماطلة الفاحشة،، يعني مو نفس الناس،، لو تسأل أي شخص مخلص بيته صباغة مع شركة اسأل عن شركات الصباغة،، يعطيك التفصيل. على ما يخلصون البيت،، يطلعون عيونك من مكانها... وأعتقد أن 99،9 % من شركات الصباغة كذابين على أصول،، إلا ما نذر.... |
| الساعة الآن 02:08 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir