قصيدة مجاراة لقصيدة ( مليون تكه) للشاعر /محمد ابن ابراهيم الدايل



باب الرجاء في الله.. ماهوب ينصك
***وحبل اﻻمل ياخوي حذرا تفكه


على جبينك ماكتب للشقى صك
***هذا الكلام الثبت مافيه شكه


وماقدر الرزاق ياقع ويدرك
***مالك عن المكتوب ملجا .. وسكه


واجزم على الكايد.. إلى ناشك ..الضك
*** ولا .. يرتخي .. حبلٍ ايدينك تتكه


وترى الحياة دروس.. لابد ..تعرك
*** صروف الدهر معدنك غصبٍ تحكه


واللي بدى في عشرته ريبة وشك
***خله عسى للذل بقعا تصكه



امقيط..عطه رشاه ..يالقرم وافتك
*** واهل الحجاز أعرف بوديان مكه


وبيت القطاعة لايجي حول مبرك
***نجم من الخلاق عجل يدكه



ولو الهموم جبال ..لابد ..تندك
*** زبر الحديد ..الطرق ﻻزم يفكه


وخوت عيالك تنشرى لوهو.. بلك
***كلن يرحب.. هات همك.. واعكه


ما منهم اللي ﻻبدا ﻻزمه ..عك
***جنيه الذهب تو المعلم يسكه
عبدالرحمن المجلي _ 20/11/1435


هذه قصيدة ابا ابراهيم محمد الدايل
@@ مليون تكه @@
يامابحياتي من مغاليق منصك
،،،كل ما بغيت انصاه بقعاء تصكه
حاولت في فكه ولاهوب منفك
،،،ابيه بالحسنى ولامنه فكه
وبالمبرد القاسي بغيناه بالحك
وعجزت مناشيرالمبارد تحكه
،،، وجبنا اكسجين الغاز والغاز منزك
وقامت لواهيب الشظايا تزكه
يوم انكسر قفله الى الباب منلك
عليه من زود الصدى ما يلكه
وفوقه جدار اسميت وصخور وبلك
،،، في وزن ضلع كميت وجبال مكه
ويا الله يالي قوته ما بها شك
بقدرتك يارحمن بابي تفكه
انصاك يا مولاي ويارب طالبك
ياخالق الاكوان ما فيه شكه
،،، تفرج هموم اللي من العام منتك
بين المحاني فيه مليون تكه
محمدالدايل ( ابو ابراهيم @١٦ / ١١ / ٣٦ ١٤ @
==========
وهذه قصيدة الشاعر ابراهيم المجلي ابا فارس
بابٍ يجي منه الغرابيل والضنك
أنصحك لا تتعب عليه وتفكه
خله على ما قيل مزلوج منصك
لو ينفتح بالغصب ياسرع صكه
من ساورك في رفقته ريبٍ وشك
أبعـد عنه يازين بعده وتـركـه
اكتم وكن دموع عينك من الضحك
ترى عذاب الحب ما منه فكـه
تاخذ قدر شهرين والقلب يـفرك
والجسم من فرقاه صايبه وعكه
ومع الزمن تنساه من صد يترك
ومن صك بابه يفتح الله سكه
منك العفو أنت معلّم ومدرك
رأيك سديد وما تبي زود حنكه
أبـو فـارس
١٦ / ١١ / ١٤٣٦
-----
شكرا يابو فارس ولا يلحقك شك
شاعر ومبدع مايجي فيه شكه
اقولها والكل عارف ومدرك
انت الكريم ولك مع الطيب سكه
وشعرك جميل ماورد جانبه عك
جنيه الذهب ماهوب صرفٍ وفكه
ارحب ولك مليون والف وميةلك
ترحيب من خاطر الى جيت فكه
------
محمد الدايل( ابو ابراهيم )
١٧ /١١ /٣٦ ١٤ مرات
@@@@@@