ربي عسى وبل الحيا يسقي طويق=من هاطلن مزنه شديدن زراقه
سحابتن ترسم مداها التباريق=فيها الرعود مطاولات اندفاقه
تنثر بردها فوق روس الشواهيق=في طاش ينبع لين عالي عراقه
من ودقها الوديان سحقانها تضيق=حتى الجذيب يزيد فيه اصطفاقه
واسدود راعين المزارع مداليق=ما فيه مجرا قالوا الحبس عاقه
توحي عويله في جروف الشخاقيق=يمسي نفود الطعس طين وزلاقه
مرماثها تصبح جرومه ممازيق=يلوي هدبها لين يجرف مزاقه
يومن يجي سيلن ويومن تراشيق=والا الطفل نوبن كثيرن براقه
ياتي على الاوراق مثل الزباريق=يبقي لمين الشمس ياضح شعاقه
يسيح منقوعه بروس الزماليق=لما تشوف نقوطه بعرض ساقه
يحلا بها المرباع بين الرقاريق=في سايحن عنده حوارن وناقه
على المفالي مثل لون الدواشيق=تلقا بها النوار عانق اوراقه
تفوح مع نسم الذعيذع طواريق=من فاخر الارياح زان انتشاقه
باقي ثلاث شهور يا فارج الضيق=على البراد اللي نريده عشاقه
فيه المزون اللي بغوها الخفافيق=يتلونها والبرق زاد انعلاقه
قروم قيلاتن عليها ملاحيق=مع كل نودن تابعينن غماقه
يهوونها صاروا باثرها عشاشيق=هوايتن ما قيل فيها حماقه
ترا التمني ما له اليوم تحقيق=الا بارادت كاشفن كل ضاقه
يجيرنا باوقات ينشف بها الريق=في ساعتن للعبد حان افتراقه
هذي خطوط القاف من دون تفريق=تنساح بالتيسير دون انغلاقه
ترا الشعر ما فيه غشن وتلفيق=ياتي على الشاعر بكيف ورواقه
يبين لو هو في ظلوم المطابيق=يلقا له الهاوي يروق لمذاقه
القاف فطري يبغا فاهم له يليق=كالطايره بالكون تبغى سواقه
ما هوب شرطن ياتي باللفظ تشديق=على الصعوبه خاتله بالدراقه
ما كل فعلن يستوي بالتماريق=حتى الشنب يحتاج فني حلاقه