قصيدة غزلية
 

أنا لي أيام عـيـني ماتذوق الـمنام
لانامو أهل البلد عيني تعاف الكرا
ماعاد حالي مثل الأول على مايرام
أسهرمع هاجسي وأسري معه لاسرا
كبدي خطيرٍ من الفرقا يجيها انقسام
و قلبي مع الهم والهاجوس باع وشرا
ياام العيون الوسيعه يارشيق القوام
يامتلف الروح حالي من غيابك برا
إن كان تبغا الكلام اللي عليه الكلام
مامعك يانور عيني فالضلوع اخشرا
ياام الدلع والغلا يااحلا ليالي الغرام
ماغيرك احدٍ على روحي وبالي طرا
وين الغلا والوفا والحب والاهتمام
نسيتها والا علمنّي وش اللي جرا
انا يامضنون عيني من عزاز المقام
لاعاد تقفي وتتركني وعيني ترا
أحبك ويشهد الرحمن رب الانـام
واعلّم اللي درا واللي بعد ما درا
لك وسط صدري يامحبوبي مكان ومقام
عن البشر والعذل واهل العذل في ذرا

فهد خالد العياضي