منتدى استراحات زايد - الدخَل " الشحيميات "- لاهالي منطقة الرياض

السلام عليكم ورحمة الله وبركاته

أعزائي أعضاء المنتدى وجمهورة اللي مطفين النور :p

بالأمس وقبله طلعت بجولة تفقدية للنزل بالمنطقة طبعا منطقة الرياض

جنوب الرياض طريق الخرج وحول الخرج من شرق وغرب وجنوب ماله لا وجود أو حتى ذكر

فقررت اطلع شرق الرياض دام حول الخرج مافيه شي

فطلعت على طريق رماح وغيلانه وهاك الشعبان ولا حصلت إلا القوقسي والعصافير والهدهد بمعني ما هي شفي وغاية مرادي وديورت على البيت وعلشان اشفي غليلي مريت محل بحي الريان يبيع حمام واخذت لي كم حبه اتعشاهن :p

فقررت اطلع باليوم اللي بعدة اللي هو أمس الأربعاء لمناطق شرق طريق القصيم :good2:

وفرقت من مفرق دقله وصرت امشي شمال

لحد ما وصلت رويغب وصرت احوم حوليها وأقول عسى فيه لو ريحه من النزل لكن يأست ,

وقررت اطلع شرق بالطريق من رويغب الى الحفنه

وقبل ما أوصل الحفنه صرت اتمشى بالمنطقة يمين ويسار

ولما وصلت للشعبان اللي غرب الحفنه

:f شبيت ناري وانا أقول ماهنا شي :(وصلحت غداي

وأول ما ضفيت عزبــتي

صرت اتمشى ولله الحمد حصلت عشاي من الدخل

صحيح انهن صغار لكن كلام المهرطقين اللي يقوولون فيهن مرض ماهو صحيح

بالعكس إلا والله طيبات والجول ما دون الخمسين او الأربعين شي

ولأني طالع أعس المنطقة ما تزهبت زهاب اللي طالع يقنص

ما معي الا ساكتون صرت اطقطقهن على وحده وحده

لحد ما جاء لي راعي سفاري غشيم صيد حال بيني وبين سيارتي على العلم ان سيارتي ماهي بعيد مني

وهنا احب انبهكم يا اخوان الخير خير ربي لا هو لي ولا لفلان او علان

وعلشان ما اتحاسد انا وياه على الصيد ( حسيبه الله ) قررت اترك له الأرض بخيرها وطلعت من المنطقة كلها "شعبان غرب الحفنه"

وانا ماشي وصلت دوار الصمان وفرقت معه يمين راجع للرياض

والحمدلله لقيت شي ابرك مما خليت لراعي السفاري ولكن لضيق الوقت على غياب الشمس ما قدرت اعس ذيك الأرض زين

لكن فيها نزل طيب

حبيت ان اول مشاركاتي تكون كمسح للمنقطه

أتمنى اني افدتكم جميعا