منتدى استراحات زايد - الفصل الأخير من معاناتي مع المكيف

السلام عليكم ورحمة الله وبركاته

حي الله الأخوان جميع
أسأل الله ان يبارك لكم فيما تبقى من رمضان

مثل ماتعرفون يا اخوان اني اعاني من مشكله مع المكيف امتدت لفتره طويله
إلى ان وجدت ضالتي في هذا الموقع المبارك وبتعاون رائع من الأخوان في هذا القسم

ندخل بالساالفه
كنت اعبي فريون بالموتر ويهرب بعد ساعات وعانيت صراحه من اللي يسمون انفسهم مهندسين تكييف
وهم بالحقيقه مهندسين تخريب بلا مبالغه

بعد فتح عدة مواضيع في هذا القسم ومشاورات عديده مع الاخوان توكلت على الله على الصناعيه

قلت ابي افحص وتبهذلت في الصناعيه القديمه (بالرياض) إلين حصلنا التهريب وكان واضح جداً
ضغطنا هواء في دائرة التكييف وبدينا ندور بالصابون الليات والمواصير والرديتر ماكان فيه تهريب
جا الرجال اللي فحص وفتح باب الراكب الامامي ونزل راسه تحت الطبلون يوم طلع قال لنا ان التهريب من الثلاجه وانها مخرومه

قلت ابي اتأكد وفتحت الباب وحطيت اذني تحت الطبلون إلا والله صوت تنسيم قوي (كنك تنسم كفر)
قلنا خلاص اجل الخراب من الثلاجه مشينا نغيرها ...

رحنا وسألنا عن ثلاجة جمس أصليه ACDelco طلعت بـ 490 ريال

وهذي صورة للثلاجة

http://store2.up-00.com/2015-07/1436499940241.jpg

قلنا نروح ندور مهندس يفك الطبلون نتفق معه ونرجع ناخذ الثلاجه
جلسنا ندورواحد يفك الطبلون والاسعااار نار اللي يقول 2500 واللي يقول 3000 واللي يقول 1500
واحنا ندور انا اشوف اشكالهم (ماش يا اخوان وجيه البعض مع احترامي موب وجيه فك وقربعه طبلون وكهرب)

المهم .. بعد عناء لقينا واحد سألنا انت تعرف تفك قال ايه لكن ترددنا قال شكلكم منتم واثقين فيني قلنا اللي ما يعرفك يجهلك ويقوم ويطلع الجوال ويورينا يمكن يجيع حول ال10 مواتر فاك طبالينها قلنا توكلنا على الله والفك بـ 1000 ريال من دون تعبية فريون قلنا توكل ..

المهم فك الطبلون في ثلاث ساعات

هذا فيديو لنفس موتري يبين كيف طريقة فك الطبلون

ثم جبنا له الثلاجه وركبها وركب الطبلون وبعدها عبينا فريون وعبيت زيت الكمبروسر والحمد لله التبريد عال العال 100%

لكن للأسف القصة ما تنتهي هنا ..

شغلنا السياره نبي نتوكل على الله إلا ألاحظ ان الطبلون موب في حالته الطبيعيه هو مشدوود لكن فيه بعض الاماكن لك عليها المهم قلت اتغاضى عن هالموضوع لأني تعبت والله من المراكض ورا هالمكيف المهم حركت وإلا ألاحظ ان الانوار ما طفت لما سكرت البيبان قلت وش السالفه واجي بفتح الدرايش ما تفتح طيب اضغط فرامل النور اللي ورا ما يشتغل مع الفرامل

بدينا في مصيبه ثااانيه

رجعت له وقعدوا يفتشون بهالسياره وطلعوا لاعبين بالكهرب قعدوا يا اخوان يوم ونص وهم يحاولون بالكهرب والله اني كرهت الساعه اللي نويت فيها اني اصلح المكيف

وكل شوي فاكين الطبلون ومن ورشه لورشه(على حسابهم طبعاً) إلين اراد الله وزانت الامور

واخذ السيارة وتوكلت على الله والحمد لله إلى الآن 20 يوم والمكيف ماشاء الله تبارك الرحمن زي الفل

يعني انا اتسائل هذا وهو موريني انه فاك طبالين لسيارات كثيره وسوى لي كل هالمشاكل لو رايح عند واحد غيره وش بيصير بي !!!
والله يا اخوان ان الواحد مااعاد يعرف وين يصلح سيارته الكل ماهو هدفه بس انه يسترزق الكل يبي يسترزق ويتعلم على موترك ولا حسيب ولا رقيب وحسبنا الله ونعم الوكيل

للفائده
ثلاجه اماميه ACDelco ب 490 ريال
فك الطبلون وتغيير الثلاجه ب 1000 ريال
تعبية فريون اصلي 134a وتعبية زيت الكمبروسر بـ 250

المجموع 1740 ريال

المهم انها عدت على خير
والحمد لله

و والله اني عاجز عن شكركم يا اخوان في هذا القسم خصوصاً اللي ازعجتهم بكثرة مواضيعي
واسأل الله ان يقدرني على رد الجميل

اي استفسار انا حاضر
تحياتي للجميع