منتدى استراحات زايد - سمك ابو نقطة

شهر مبارك عليكم ياأخوان ، والله يتقبل صيامكم وقيامكم

في احدى زياراتي للمنطقة الشرقية ، كنت انا وخوي لي نتمشى على الكورنييش وتحديداً المنطقة اللي بين الدمام والخبر على حوالي الساعة 11 ليلاً ، فشد انتباهي اثنان من الشباب ( عرفت لاحقاً إن واحد منهم من الرياض والثاني من الأحساء ) ،

كان معاهم اربع سنارات ذات قصبات طوال ، ورادو ، وبراد شاي على الجمر ومنقد ويشوون ومعاهم حافظات كبار فيها ثلج ....وفلة حجاج

سلمنا عليهم ، وقلطونا والصراحة الشباب كانوا كرماء ، والكريم ما يرد ، أخذنا معهم بيالة شاي ، ولاحظت كل دقيقتين صايدين لهم سمكة ، لكن حجمها صغير تقريبا ربع او نصف الكف ، وان كانت صغيرة مرة رجعوها البحر ، والله وما قصروا خلويني اجرب الصيد..

قلت لهم مستغرب ، ليش تصيدون هالسمك الصغار ، نقز واحد من هالصيادي الشقردية ، وجاب من على الجمر ، واصر إلا أن اذوقه ، الصراحة أكلت السمكة الأولى مجاملة أما اللي بعدها فلا والله كان طعمه جداً لذيذ

بعد السوالف والأخذ والعطاء، تبين لينا انهم معم هالحافظات ، وانهم من العصر وهم مبشكين سواليف وفله يصيدون فقط هالسمك الصغار اللي اسمه( ابو نقطة ) ويعبون هالحافظات ، وكانوا بين فترة وفترة معهم قشر ربيان يرمونهم في البحر في المنطقة اللي عندهم ، عشان يجذبون السمك ( حسب كلامهم ) ، واعتقد ان طعمهم اما كان عجين أو يقطعون من هذيك السمكة المربعة ام ذيل طويل ( والله ناسي اسمها)

بعد ذلك قررت أنا وخويي اننا نسوي نفس الشيء اللي سووه الشباب

فأبي يأخوان نصائحكم ، والإجابة على بعض تساؤلاتي :

1- وش السنارة المناسبة لي ، علما بأنني مبتديء ؟

2- وش الطعم اللي يحبه أبو نقطة ؟

3- وش أفضل منطقة للصيد ؟

4- هل يحتاج ابو نقطة تنظيف قبل الشوي ، ولا يحط على طول على الجمر؟

5- هل من نصائح أخرى؟

والله يحفظكم ويرعاكم