يا ناقل الطير الوحش عجرف الصيف=وتناسجت فوق الطعوس السوافي
دفاين القيعان لوي الهفاهيف=وقدامك اللال بصحاريه جافي
في مقبلات الوقت مثل الخذاريف=توالت ايام المقيظ العجافي
لا زالت الحزات ما فيها توصيف=قيظن يعوق الصيد والجو صافي
ليالي الربطه كما فهرن محيف=مثل شواظ النار بالكون هافي
يضرب حنايا القلب مثل القواصيف=يثير موجاتن بطاش الخوافي
هجايسن ما بين شوفه وتعليف=وتوارد الذكرى على جو دافي
حاير كما المقهور بالحبس ما شيف=يبغا الفرج راجت عليه الجوافي
والا كما طفلن عليه اللفاليف=مربوط باسباقه عساه متعافي
ما غير يعاين كم على الطير تحذيف=وكم باقي بدورات الايام لافي
هذاك وقتن ما على الناس تكليف=على جداد الغيد عقب الخرافي
مغزاه بعد سهيل مع دلة الكيف=والطير مركوزن به الريش وافي
باول خيور الوسم مع باين الطيف=يوم السحايب بالمناشي وقافي
وبوادر الباذر بشاير على الريف=صارت على الصقار وقت متشافي
يدور بالوديان بين المشاريف=ناوي على خربن بروس الشعافي
اليا تكوبر كافخ الطير ثم ليف=بدا يسطه بالكفوف الصلافي
اليا تماكن خلصه دون تعنيف=والا يسيح الدم ولا هي حسافي
يكفيه ظفر الطير في خربن مخيف=والا العنيمه ما عليها اختلافي