يا ناشدن عن عيلتي لاي الانساب=لا باس ابعطيك الجواب السليمي
ان كان من شان الفخر فاصلي تراب=وان كان لجل العرف مسلم تميمي
بلال من سود البشر مير ما خاب=وابو لهب باقصى جهنم يهيمي
كم واحدن عايش بالادغال ما عاب=وكم واحدن باير وهو بالقصيمي
دنيا تفانت بين بايع وجلاب=والموت من بين الخلايق غريمي
لا ترهي في دنياك واتصير كذاب=تقول فاهم والحقيقه عليمي
ما يفرقك عن جرذي البيد والداب=اليا وطيت الشرك ما تستقيمي
ما تدري ان النار في سبعة ابواب=تلقا لها مع كل مدخل حميمي
فيها لهيبن لو لمس جندلن ذاب=وزبانيه في طوع ربن عظيمي
لها زفيرن لو لقاه الولد شاب=ولها شهيقن مع سعير وضريمي
باكر ولي العرش يامر بالاسباب=يعيد يوم البعث عظمن رميمي
في ماقفن كايد به الكل ما غاب=فيه آدم وحوا ومارد رجيمي
فيه الخلايق تذعن لعرض واحساب=يوضع به الميزان ما به زعيمي
يومن شديدن كله صراخ وارهاب=يالله عفوك في زمانن يضيمي
راجينك الفردوس وانهار واقباب=وامجاور الرسل الكرام بنعيمي
وارضاك يا ربي رجا نادمن تاب=ما غيرك اللي ياقا عنا الجحيمي
شفي كرم عفوك عن حمول الاتعاب=بين الرجا والخوف بالي مقيمي
مرات اقول اني على الخير وثاب=واحيان اخاف عقوبتك يا رحيمي
يا ربنا المعبود فكاك الانشاب=يا خالق الدنيا ومحي الهشيمي
انك تزيل ذنوبنا ويا الاكراب=فيك الغنى يا رب عبدن عديمي