السلام عليكم ورحمه الله وبركاته

عسا ماتملون مني وبربرتي خلاص خذوذا السوالف الي تستاهلونها وتستاهلون تعب ذا الاصبع الي ينقر بالحاله جعل ربي يحفظه :D


ياشين الحرص الزايد وبس خل اعلمكم مره كنت اغير زيت السياره وكان ذاك اليوم اول يوم في عيد الفطر وكنت مسافر بالسياره وهي جديده وغاليه وناكاشخ بعد على قولتهم:p المهم غيير اليماني الزيت ونا معي واحد من ربعي وكان جنبي سياره كابرس اجره يغير الزيت بعد ومليان ناس المهم يوم قال اليماني خلاص غيرت الزيت مدري وش بلاي شكيت انه ما ربط الصره زين ونا عاد متكشخ الثوب جديد والشماغ جديد وتكرمون الكنادر جديده والكبكات الجديده المهم كلي الق لق هههههه وروح ابا اطل على صره تغيير الزيت وتلا علمي بروحي ونا واقف عند كبوت السياره من قدام وزلق داخل الحفره حقه تغيير الزيت بسرعه البرق وعلى ضهري زحليقه وصار اليماني يغير الزيت في الحفره مباشره يعني حفره الزيت تاصل للركبه تسبح من الزيت ونا الي اطلع عليهم كلي صاير اسوووود من الزيت كلي اتقاطر:D ويظحكون علي الي في التكسي الي جنبي ضحك ويظحكون علي سيارتين واقفات مليانه عوايل يوم شافوني الله لا يخزينا بس ورفيقي سدح المرتبه ويغشا علي من الظحك امحق من يوم عيد وروح للبقاله وكلم راعيها ونا برا كلي اتقاطر زيت عندك ياالاخو ثياب قال فيه ثياب صينيه الصنع بس ما عندي مقاسك ما عندي الا صغير قلت عطنيه وهو ياصل طوله الا فوق الركبه ولا الوسع ما عليه وروح وغسل وش اغسل زيت محروق وش يبي يخره تصدقون تروشت بصابون تايد حق الملابس ولا طعت انضف هههههه وجدع جميع ملابسي وطب في المدي وهو حوض يملونه بالماء للي يبي يشرب من غنم وحمير وبعارين وكلاب المهم وجلس على حيلي في وسط الماء ونا افرك وكب تايد وفرك مافيه فايده والبس الثوب الصيني كنه فنيله من قصره وذكر لونه بيج او اصفر ويابس يطقطق ولابس بعد تكرمون نعال زنوبه ام صاروخ ما لقيت الا هي في البقاله وتعال شفني ونا امشي شي ماله وصف كني ذيك البطه الي تدحرج ومعها عيالها كني جاي من كوكب ثاني وكل من يشوفني من الي يعبون بنزيم ولا عند المسجد يصلون ولا في القهوه جالسين يشرون علي وهات ياضحك ويوم شافني رفيقي ولا وش يشوف وهو الي يغشا علي من الظحك مره ثانيه
واليماني ماشفته لاني دورت عليه اول ماطلعت من حفره الزيت ابا احط حرتي فيه بس مدري وين اختفا فيه
ونادي عليه ابي اعطيه دراهمه بعد هو ماله ذنب في لقافتي وحب الخبر وعدم الثقه المهم عطيته حقه وقلت فكك الله مني يومني توي طالع من الحفره كان والله لسبحه مثلي بس مع الوقت والظحك انتها كلش ونتهت ذا السالفه

شوفويالغالين منول نتعايش مع الجن ونشوفهم بعض المرات وذا الكلام ايام بيوت الطين ونشدو العجيزات جمع عجوز ختيارا :p
اسئلوهم يبي يصيرعندهم سوالف عنهم
فيه في شقراء عجوز جعلها للفردوس ميته من سنه جدي جعلها للجنه وميمتي وبيي وخيي وجدي بعد تقول انتم خابريني قبلي في الموقد ازين قرصان ومنول ماعندنا شي اسمه مطبخ لو تقوله ضحكو عليك الناس يبي يقولون الله من الموقه يسمي الموقد مطبخ والصفه يسميها غرفه الله مار يهوون ضده ذا الماااايق
المهم تقول العجوز قبلي في موقدي ازين القرصان تقول والله العظيم ان فيه حرمه من اهل الارض رفيقه لي وقبلها تجي عندي الضحى ولا الصبح وتقعد تعاوني على القرصان
وتقول العجوز ماعمري شفت وجهها قبلها مغطيته بشيله وتسولف معي وتضحك وتقول يم عبدالله تراي احبك في الله وغلاك في قلبي وتقول العجوز اني قلت جعل ربي يحبك وملائكته ونا بعد احب في الله ونتي تعرفيني احبك المهم تقول العجوز وكل يوم من اصبح الين اخلص من القرصان وهي عندي تعاوني وتقول يوم جا ذاك اليوم وباقي على الحج اسبوع قالت يم عبدالله ابشرك ابا احج ذا السنه تقوله الجنيه وتقول بس ماعليك يم عبدالله ابا اوصي بنت اختي تجيك كل يوم وتعاونك الين انا ارجع من الحج بس اسمعيني يم عبدالله ان شفتي ماتكرهين منها ولا كشفت وجهها لك لا تخافين منها ونا اختك خسخسي لها وطرديها وقولي لها لا عاد اشوفك جايه عندي قالت ام عبدالله انشاء الله والله يتقبل منا ومنكم صالح الاعمال وتجعين علي بصحه وسلامه وغفران وراحت راعيه الحج تحج وتجي بنت اختها وتعاوني اليوم الاول والثاني ويوم صار نهار ثالث وتجي عندي في موقدي تقول العجوز يوم التفت عليها ولاها كاشفه وجهها تروعني ولا وشذاك الوجه الي يخرررع من شينه تقول العجوز على طول قلت لها اخسي وقطعي يالحماره ويالله روحي عني ولا عاد اشوفك جايه عندي تقول ام عبدالله وطردها وخسخس لها وتروح ولاعاد شفتها ويوم قظو الحجاج من الحج وتجي من حجها الجنيه الحبيبه وتسلم على ام عبدالله وتنشدها عن صحتها ثمن قالت نكثت العهد الحماره وخلتك تشوفين وجهها والله انه جايني العلم ونا في مكه وضيق صدري بس هين ماوالله تخلا لها اني اخذ حقك منها ذا الحماره
وهذا كلام العجوز بالي حصل معها وتراها حافظه القرءان جعله شفيع ولا لها بالكذب ومشهود لها بالصدق وتقوا الله سبحانه

وهذا بعض القصايد والشعرالي سمعو به الشياب منول عن الجن يقولون سامعينهم يقولون ذاالشعروالقصيد




اضحيـت انا فـي حــب سلطانـه

وكل الغلازايدن من حب راعيها

طبعن الجن ما يقولون اصبحنا لا يقولون اضحينا -

ويوم سمعت ذاالبيت من الشعر ونا الي اقول ماتاقف علي ونا ولد ابوي :D وقلت


ونشدت انا القلب منهو من شانه

وقالت جحودن وتجحد من يبكيها



وهذي بعض الاشعار الي سمعوها بعض الشياب للجن وهم يقصدون -

حديناها بديناها إلى برج الحماوية = عليها طوق جدتها شرى مهوب عارية
حديناها بديناها على المعرس بزولية
==

زارنا عمرن بليل = ليش لو ياتي نهار
تبرض الاشجار = حنى والكلالي زعفران
دارنا دار جديدة = ومنقطه بالزعفران
مابها كون يصلي = كود صفات الحمام
====

وسع الله صدوركم بالعافيه ومتعكم متاع الصالحين جميع امين

وفي النهايه اقول سبحان الله والحمد لله ولااله الا الله والله اكبر عدد خلقه وزنه عرشه ومداد كلماته ورضى نفسه