.سب تانك. الفتك بالرمله عمل بي عمله..
 

السلام عليكم ورحمة الله وبركاته
اسعد الله اوقاتكم بكل خير
احبتي ولعت علي لمبة لتانكي الاحتياطي فتك 2002 ونا بالنفود شمال حايل ولادري كم بقى بالتانك الاساسي ولاحولي مصوت والله اني ذليت وخفت كلهن المهم تعوذنا من بليس ونصفط انا وخويي العصير القصير ونسحب من هشيم الاراطي ونشب نارنا وقول هالبيتين
شييت ناري عصير حدر الاراطي ..وتمر الحسى معبوط في سمنها عبط
وسط النفود وزاد فيها انبساطي.. طعس طويل مقوس محجره هبط
كيف وناسه مر من غير باطي..وعزي لمن همه ربط خاطره ربط
ونتعشى ونمرح ويوم اصبحنا وفلحنا وصطبحنا من حليب مع الزنجبيل على الجمر ونتوكل على هالكريم وهفه مع قوس
هاك الطعس ابختصر المسافه على القارمن والياوالله انها
هفت مقيط ورشاه حوامتة اسهلها عسير اعود ونسم زياده
ونخا الفتك بالهبيتين قلت

يالفتك رمله ولالي لوم....انته ونا بالخلا الخالي
في قوس قعريحجب نجوم..سهساه رمل وهيالي
لوالله ان ماطلعت اليوم.. .. .يزيد همي وغربالي
تبي القدر جابنا المقسوم..لاحس لاوناس لارسالي


وتوكل على الله وتله ويطلع يوم الله طلعه ويوم اقبلت على سيف النفود ويشخر بنزين يعاطس له شوي ويطفي


وش توقعون ابا اسوي التانكي الاحتياطي فيه شخال
ماتقدر تسحب منه.

المهم وسحب الجركل الاحتياطي اللي اللي نصحني به الاستشاري حق البراري قال شله معك لطواري يمكن يقطع ونت ساري علقت بغيت اجيب قصيده ههههههه

وصبه حول40 لتر وجيك مروح تقل اشتقت لهلي زياد والحمدلله على السلامه..
ويوم جيت البيت وفصل البطاريه وشبكها من بكره ويضبط ويومين والثالث يجيها بلاها بالخير علق ماعاد يستجيب

حصل هالعطال بهالرحله وهالبويتات قلت اوسع اصدوركم بها..

ولعل الله يجعلكم سبب خير في تصليح موتر قالي واحد الوحه خلف الطبلون بغيت افكه ودبر به خابرني اليافكيت
شي اما اصلحه ولا اخربه وخرابي اكثر

اوصي مدمنين البر مثلي مايخلون 3 اشياء البنزين والماء والتمر مع غيره من ايكوم وقرامن وثريا واتكل على الله

والله يحفظنا وياكم من كل سوء انه سميع مجيب

سامحوني طولت عليكم واستودعكم الله. .