سويت غسيل للمكينة وانكسرت بعد 30 كيلو فقط
 

السلام عليكم ورحمة الله وبركاته

قبل 3 ايام غيرت الزيت عند أحد البناشر الحديثة بالدمام
توه فاتح والحقيقة البنشر متطور مافيه حفر كلها رافعات حول 6 وشكله يفتح النفس وعمالته هندية

المهم سألته بكم غسيل المكينة قال الجالون بـ 60 ريال وتحتاج جالونين
وافضل نوع شركة فوكس
وقام يمدح ويوم فك الصره قال الزيت عندك أسود مره فالافضل تسوي غسيل يرجع لونه ذهبي وينظف جميع الاوساخ ومن هالكلام قلنا توكل على الله .

حط زيت الغسيل بالمكينة لمدة ربع ساعة وطفى السيارة وفك الصره وشفط المتبقى بالكرتير وغير الفلتر ( انا جايبه معي أصلي من الوكالة )
وصب زيت 20-50 سوبر موبيل 1000

ونظف فلتر الهواء والصراحة العامل كان شغله كويس للامانة

مشيت من الدمام الى مديتي الجبيل وبعد تجاوز 30 كيلو
الا وصوت انفجار عندي ويالله أمسك السيارة تحس فيه شي تحت السيارة يجبرها على الانحراف

طبعا انا توقعت اني بنشرت وفي بالي ان البنشر كايد ان الكفر تقطع او الجنط انكسر او طاح تحت السيارة في اسوأ الاحتمالات لان الصوت قوي ورجه قوية بالإضافة سحابة من الدخان خلفي سرعتي كانت 120

والحمد لله سيطرت على السيارة ووقفت جنب الخط وطفيت السيارة بسرعة
لان صوت السيارة قروشه ( قلت بس الجنط تحت السيارة هو مسبب الصوت )
يوم انزل الا كفراتي سليمة مافيه شي
وأناظر أسفل السيارة والا نص المكينة ماله أثر من فوق الكارتير

أنكسرت من النص بشكل طولي

سحبت السيارة للورشة والصباح مريتهم أعاين الاضرار والا جرم المكينة كان داخل قنبلة وأنفجرت سالة الميكانيكي عن السبب
قال نقص زيت وسببه احتمالين :
1- اما ان غسيل المكينة سكر طرمبة الزيت من الوسخ ولا صارت تطلع زيت وضربت
2- أو العامل ماشد الصره مضبوط وطاحت ونقص الزيت وضربت

يعني بكلا الحالتين المتهم البنشر
اليوم الثاني جيتهم أخذت فاتورة من عندهم كلمت رقم الادارة بالفاتورة قال بننقل كلامك لصاحب المؤسسة اليوم الثاني قال مالك شي عندنا
حنا مانعطي ضمان بعد تغيير الزيت وشغلنا مافيه خطأ

طبعا انا أفكر اشكتى :
سواء على البنشر اذا هم المتسبيبين
او شركة فوكس اذا السبب من غسيلهم فليه يبيعون غسيل يسبب مشاكل بالسيارة وعدم وجود في نشرته على تحذير انه ممكن استخدامه يسبب مشاكل

ومستعد اودي السيارة عند ميكانيكي على حسابي متفق عليها من الشرطة والمدعي عليهم يفكك المكينة ويكتب تقرير
اذا ثبت ان المكينة سبق ان وضبطت او تعرضت للحرارة او عمرها منتهي
انا ادفع قيمة التقرير ومع تقديم اعتذاري ومايطلبونه
واذا ثبت ان المشكلة من زيت الغسيل او نقص بالزيت بأطالب بمكينة كاملة
وتعويضي عن الفترة الى جلست السيارة خربانه وقيمة نقلها وأستأجار سيارة

فنصيحي لكم أخواني عدم عمل غسيل مكينة نهائيا مهما أعطاك العامل من مغريات لو يقول بسويه لك ببلاش
طبعا مكينتي باترول 2005
ولا أستغني عن نصايحكم أخواني