|
صوت السلام عليكم ورحمة الله وبركاته اخواني اعضاء مندى مكشاتي اختنا ومشرفتنا العزيزه قوافي والجميع كل عام وانتم بخير يسرني ان اقدم لكم قصه رواها احد ضيوفنا الكرام ونقلتها بعد تسجيلها لاعجابي بها قبل كم اسبوع كان اخوي الكبير الله يحفظه عنده عشاء لضيوف ناصينه ومن طبع اخوي انه لايمكن ان يطحن القهوه الا عن طريق النجر خصوصا لاصار فيه مناسبه يطرب لصوته وعندنا جار من الشمال عنزي وكان مسير عليه ابوه جاي من الشمال وجالسين بحوش بيتهم يتقهوون بعد صلاة العصر وسمع صوت النجر وقال لولده انا اسمع صوت نجر وينه قال الولد هذا عند جارنا وتراه عازمنا وملزم علينا انا نجيه ولا صلينا العشاء بنروح عنده قال الشايب لولده ماعليه المهم جاء بعد العشاء حضروا ضيوف اخوي ومن ضمن من جاء الشايب ابو جارنا تقهواء وبدت سوالف الشيبان اللي تطرب لها المسامع قال الشايب العنزي انا بعطيكم سالفه وقصيده عن النجر وصوته بعد ماسمعته من عند معزبنا الله يعطيه طولة العمر على طاعته العصر يدن النجر وانا من الناس اللي يطرب لصوته وذكرت لي سالفة واحد من ربعنا اسمه خليف يحب صوت النجر ويتعب على سواة القهوه ومن اللي يحرصون على طيبها وعنده جار شراري اسمه عيد مثل خليف على القهوه وصوت النجر بعد سنين طويله وهم جيران راحل عيد الشراري وبقي خليف وبعد رحيل عيد بكم شهر نزل عند خليف جار وقام ب اكرامه وذبح له وقام بواجبه وفي اليوم الثاني قام خليف ودق النجر كالعادة كل صبح ويعد يوم جاه جاره وقال ياخليف لا تدق النجر صوته مزعج يضايق غنمي لكن خليف ماصدق الضيف ويوم جا اليوم الثاني قال الضيف ياخليف تراك ضايقت حلالي وحلالي مو ضاري لصوت النجر فكنا من صوته الله يهديك لكن خليف رجل مايصبر عن القهوه وصوت النجر قام ودفن النجر حتى يوم يدق مايظهر صوته اكراما لضيفه يوم مر كم يوم تذكر خليف جاره عيد اللي كان يسابقه على دق النجر وسواة القهوه وقال هالقصيده: النجر بالارض الهياله دفناه نخاف فرقة جارنا يسمعنّه لو كنت انا اطرب له اذا دق بغناه لكن منعنا جارنا لا ندنّه اذا هدر ياشوق عمشا عقلناه واخاف صفري ان سكت يكرهنّه الين ماعيد الشراري حلاياه اللي لهم في دنة النجر سنّه احدن من الاجواد ودك بلاماه ودك بقربه والليالي تمنّه واحدن من الاجواد ودك بفرقاه لو طال مقطانه رحلت انت عنّه يوم شاف خليف ماعاف والحال اللي مايسره ترك الدار والجار ورحل هذا ماسمعته وسجلته ونقلته لكم اتمنى ان ينال اعجابكم والسلام عليكم اخوكم/ابو نواف |
| الساعة الآن 03:11 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir