|
سالفة :شششششششششش .. قوافي مشرفينا اخواني اخواتي زوارنا الافاضل حياكم الله ويامرحبا بعلمكم بشي ،، وانا صغيره كنت احسب ان التلفزيون او بطن التلفزيون يسكن بسطه الناس اللي يطلعون فيه((مذيعين ،،ممثلين ،،اطفال،،حتى ميكي ماوس وباباي)) واحجامهم صغيره يعني اقزام بالحيل،،عاد تلفزيونات اول يسكن به حمايل من كبر بطنه.. هذا سري اللي ما علمت فيه احد لعلي افوز بأصدقاء على كيفي ،،وقبل وجهي مغبر على شكل خطوط من كثر ما اراقب شبك التلفزيون كود يمر احد من جمب فيوز او سلك اشوفه.. سالفتنا ماله دخل بالسكان ولا الاقزام ،، السالفه اننا متاكدين ان التلفزيون لين صك يجي حدى المذيعين الساكنين ويوش : شششششششششش يعني انتهى الارسال ويبتل يوش ألين باتسر .. واول مستحيل يشغل التلفزيون اكثر من ساعه لأننا ننام عقب المغرب وهذا قبل السن اللي تفرض علينا فيه الصلاة ولا هناك هاك الاهتمام له.. جونا ناس من الديره وما يعرفون التلفزيون شخصياً :D سمعوبه بس.. بنتهم عاديه لكن انا بصراحه ما أهضم اي وحده إلا بعد ما أنضرب عشان ارحب بالضيفه :p.. وكل ما قالت شغلوه بشوف ،،أرد صاك،، حتى لوهو يشتغل واقول الناس اللي فيه راقدين ومطفين الانوار وماتقدرين تشوفين شي حتى اسمعي : ششششششششششش وانا اللي اطلع الصوت وهي تشوف وتسمع والمشكله اني مصدقه نفسي وانا اللي صاكته ،،وتسكت (ماله حيله) ثلاثة ايام والتلفزيون يوش مافيه اي امل ان الساكنين يفتحون اللمبات ويهذرون علينا ونشوف ونسمع .. امي وامه منتبهين لكن مسكتات لعل النهايه اشغله للضعيفه وينتهي الوشيش :D لكن!!!!!! رابع يوم قالت امي : قوافي بنتي الشيخه (تبي تحسن المزاج ولكن هيهات) قومي العبي مع فلانه بالطايه ،، قلت: ششششششششششش قالت وش ذا؟؟ قلت طفت لمبة الطايه وحنا الضحى ونامت الدرجه والجدران:eek: ومب راقيه :eek: عاد عقبه بتلت اوش وطفى ارسالي من عود الخيزرانه:D وسلامتكم تحياتي وتقديري واحترامي |
| الساعة الآن 03:49 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir