تجربتي مع الميزان السوري- الخضريه الدمام
 

عندي دودج دورانقو ويلعب يمين يسار فيه روغه بالطريق فوق سرعه 110 مع العلم انه سبق وصار له حادث بالجهه اليمني وغيرت عكس الدوده الايمن ..وايضا غيرت المساعدات الاربع والمقصات جميعا وغيرت الكفرات والجنوط ووزنت اذرعه ومقصات وسحبت شوي من الشاصيه امامي ..عملت كل شي وما زالت السياره تراوغ ..يمين يسار وخاصه مع المطبات وغير راسيه. ..بدون رجه او صوت او ثقل بالدركسون.
وبعدما دوختني السياره ودخلته عند المتحده الوكاله مرتين ولم يتضح لهم سبب الروغه واللعب بالخط..قالوا المره الاولي حط كفرات نفس المقاس..ورحت وركبت طقم جديد وجنوط بعد..
والمره الثانيه قال الخبير الفلبيني الداج بفرع الجبيل ممكن بيم بعد الدوده معوج ويحتاج تعديل..وهو اصلا بيم خارجي خفيف ما يوثر بالموتر شكله..
المهم رحت وعدلته باللحام..ولا فاد نفس المشكله بدون تحسن يذكر ويئست من الموتر رغم اني عشقت الموتر وحش بالطريق..
رحت ليماني بزعمه خبره وقال ميه بالميه غير المساعدات الاربع..غيرته وما تغير شيء.
وطحت في الدمام بالخضريه علي الميزان السوري والله يفتح عليهم 5 شباب سورين يعملون بصمت وهدوء وبمصداقيه وبدون رح غير وجب ..قعدت عنده الموتر نص يوم ومعظم الوقت انا معه المعلم علاء..وبعد البحث والتقصي وفحص كل جزء ممن السياره واخذ مقاسات كل عمود وارتفاعات السياره البدي الشاصيه الهوبات ..تبين هناك فرق في مسافه اليمين عن اليساربالدوده ..وفك مسامر اللي يثبت الدوده بشكل افقي علي الشاصيه والذي كان منزاحا وتم سحبه من قبل عند اكثر من ورشه بلا فك..وبعد ان فكه المعلم علاء تبين انه معوج..وعند المطبات ينثني فيصبح تخلخل في توازن السياره فتلعب يمين يسار..وخاصه من الجهه اليمني والتي بالفعل كان المسار معكوفا..
تم الاصلاح وبسعر بسيط جدا مقارنه بما تم صرفه من قطع غيار وشغل يد ما يقارب خمسه الالاف ريال بالورش الاخرى..
وموقع الميزان السوري في الخضريه بعد ما تلف دوران من اشاره الملك سعود ثاني دخله يمين يجيك محل باغلوم لقطع الغيار يمين امش شمال ثاني دخله يمين ثم يجيك علي يسارك.
أنصح كل واحد تكون عنده مشكله مماثله او يشك بسيارته غير متوازنه وغير راسيه يروح للميزان السوري
والمعلم اسمه علاء
ورقم جواله 0564907080