منتدى استراحات زايد - آليه إختيار العناوين وطرق التفاعل ....

إخواني الكرام السلام عليكم ورحمه الله وبركاته وبعد

من باب المحبه لكم جميعآ ومن باب الإنظباط والإعتدال في إنتقاء المواضيع والخروج بالفوائد المرجوه من كل موضوع او مشاركة يتم طرحها يرجى التركيز بإختيار المواضيع وأقصد من ذلك (عنوان الموضوع فقط) ولا يهم المضامين الداخليه للموضوع ايآ كانت ، حيث يكثر مؤخرآ طرح مواضيع لا تعلم مالمطلوب منها او ماذا يقصد الكاتب بكلامه او تقعد تفكر هل العنوان يتوافق مع صلب الموضوع او لا .
اسمحو لي بذكر أمثله وانا يعلم الله لا اقصد احدآ بعينه ولكن من كثرة ما نشاهده صابتني تخمه واصبحت لا افتح المواضيع الجديدة لأنها دسمه (بما لا اشتهيه) وعلى سبيل المثال ادرج لكم كم عنوان حتى اقرب لكم المقصود :

1. يا صاحب التوانك ادخل .
2. اهل الخبرة ارجوا المساعده .
3. اللي مجرب يدخل ضروري .
4. اهل الفزعات تفضلوا .
5. أهل الخبرة بالجيوب يدخلون مطلوب فزعه .
6. من يخبر لي بالون ؟
7. إستفسار عن الأمريكي .
8. عندي تقطيع بالسيارة ارجوكم الحقو علي .
9. إستفسار عن المواطير .

العناوين اعلاه تعتبر مشابهه بنسبه كبيرة جدآ لما يحدث في مكشات بشكل يومي وعندما ترعص الماوس على العنوان تجد ان المتحدث يتكلم عن شي يختلف جذريآ عن عنوان الموضوع فتجد انه يطلب فزعه راعي توانك وانت خبير في توانك السيارات واذا دخلت لقيته يتكلم عن توانك البيوت كم اسعارها وإيش الأفضل منها.

واحد آخر يتكلم عن الفزعات تكفون ومدري ايش وتدخل وتلقى الموضوع إستفسار عن بواجي سييرا !!

متحدث آخر لديه إستفسار عن الجيوب وانت فاهم بالجيوب وتدخل على موضوعه وتلقى الرجال يتحدث عن مشكلة او سعر جيب (دايو) وانت اساسآ ما عمرك شفت هالجيب ولا بكتاب العلوم ولا تقدر تفيده بشي واخذ من وقتك عشان تدخل موضوعه وآخرتها تقول بينك وبين نفسك طلع دايووووووو ( انا مافي معلوم).

شخص ثاني يستفسر عن بالون وانت عندك كم طقم خاشها بالصيف وتبي تترزق الله بالشتاء وتبيعها وتقوم تفتح موضوع الرجال بالشريط المتحرك عبالك بن زقر وبالنهايه تلقاه يتكلم عن بالون رفع السيارة اللي بوسط اللياي !!!!! .
والأعجب من ذلك ان غالبيه اللي يفتحون مواضيع إستفسار او غيره ما تلقى على مواضيعهم مشاركات سريعه لازم تتأخر المشاركات اقل شي نص نهار والسبب ان الناس (المعنيين) بموضوعك ما فتحوا الموضوع لأن العنوان مبهم وتلاحظ ان المشاهدات واجد ولكن دون تفاعل وبالنهايه تقول (50 مشاهده ولا جواب مو معقول وين شباب المنتدى !!!!!!) اللي مو معقول يا اخي هو عنوانك اللي مسوي حادث مروري فلو سويت بعض السمكرة على العنوان كان جوك الناس المختصين بموضوعك وافادوك بكل بساطة .

يأتي سائل ويقول وش تبي الرجال يكتب طيب ؟؟؟؟؟ : الجواب ادناه :
1. يا صاحب توانك الباترول ادخل .
2. اهل الخبرة في خرازات البرنو ارجوا المساعده .
3. اللي مجرب الطيران الشراعي يدخل ضروري .
4. ممكن فزعه كيف اعرف الأيكوم الأصلي من التقليد .
5. أهل الخبرة بالجيوب التايوتا يدخلون مطلوب إستفسار .
6. من يخبر لي بالون (هيرو) مقاس 16 ؟
7. إستفسار عن الجمس القديم 1979 .
8. عندي تقطيع بسيارتي (تاهو) ارجوكم الحقو علي .
9. إستفسار عن مواطير الهواء نوع ابو جمل .

الفرق بين العناوين اول الموضوع وما تم كتابته اعلاه كفيل بالخروج بفائدة لكلا الأطراف سواء المستفسر او المجيب وليتنا نفكر قبل سدح الموضوع بعنوان يجر ويسحب الشخص اللي بستفيد منه بكل سهوله وبأقرب فرصة ممكنه .

اعتقد وجهه نظري وصلت واعلم واثق تمام الثقة انها لن تعجب الكثير ولعل لغتي فيها خشونه قليلآ لكن اللهم اني صائم والله من وراء القصد .
دمتم بخير ،،