عجزنا نصبر عن هوا البر يا ناس=حتى لو ان الوقت بالصيف قاسي
اخذت بارودن ودله ومحماس=وركبت فوق الجيب مابي نعاسي
ومسيتها من بين مزموم الاطعاس=مع السريع اللي به السير راسي
بغيت قفرا ما سطع فيها الاكباس=ولا بدا لي في جبلها هماسي
ولا وطا فيها من الخلق عساس=ما غير ذيبن بالرجوم متواسي
وان هبت لفوح الصحاصيح لا باس=حتى لو القيعان قطب وهراسي
المهتوي مرتاح والجو محتاس=سعيد حال وما ضوا البال باسي
ما لازم اطبخ تيس والتوت بالكاس=واجلس على هبرن بعرض التباسي
يكفيني منتوج الخلا تين وبسباس=لو اشتوي ديك الحجل مع غباسي
وحطيت بالقلته شعيرن ومفقاس=وقعدت في ظلن لقيته مقاسي
وحمست بنن لايقن يقعد الراس=ومطارتي علقتها عند راسي
والملقمه عبيت ماها على قياس=وقريت سبع آيات وابليس خاسي
ودليت اطورق واكتبه فوق قرطاس=قافن كفخ بين الخواطر يقاسي
واخذت فنجالن جلا كل هوجاس=مع شربة الثالث تقافا عماسي
واوحيت حسن واثره عيال درباس=في رجبتن دون الجذيب ورواسي
تعالت الاصوات في كل مرماس=حس الزراجي والرخم والبساسي
صوت الطبيعه يبعد هموم الاتعاس=يريح بالن عقب عامن دراسي
اخير من طبل وكمنجه ومرواس=يالله دخليك ما نريد انتكاسي
يالله راجينك ثباتن بالانحاس=والهمنا ذكرك لاغدا البال ناسي
واتجيرنا من كيد وسواس خناس=ومن شر ميلات الدروب النحاسي