منتدى استراحات زايد - وداعا لفك المكينه لتغيير جلد البلوف يا أهل اللاندكروزر

السلام عليكم ورحمة الله وبركاته
تقبل الله منا ومنكم الصيام والقيام على الوجه الذي يرضيه عنا .
من باب المحبة لهذا الموقع الشامخ و لأعضائه الكرام أطرح مشكلتي وحلها في هذا الموقع .
سيارتي لاندكروزر جي اكس آر موديل 99
المشكله نقص علبه ونصف إذا مشيت 1500 كيلو والزيت يقلب والمشكله مافية دخان من السيارة ومريت على أكثر من ورشه وكل يدلو بدلوه اللي يقول مبوشة واللي يقول يبغى له شنبر المهم مالكم بالطويلة صملت اني ابحث عن تغيير جلد البلوف بدون فك المكينة وبدأت رحلة البحث في منطقة الرياض لأن في خميس مشيط ذكر لي واحد وواحد بحائل المهم رحت للصناعية الكبيرة بالرياض ولقيت يماني ب1200 بس شفت الورشة لك عليها ولطعوني ساعة ونصف ما أحد كلمني وأن أستخير وأتلها لصناعية الشفى وألقى لي ولد شباب سعودي( الله ييسر أمر ويوفقه دنيا وآخره ) شغال بأحد الورش وهو يمدح لي واحد تركي كان شغال معهم من سنين وانتقل لورشة ثانية بطاقم تركي و2 هنود وأنا أقفز له على طول وجيت الرجال . رجل بمنتصف عمره وجهه يريحك كثيرا اسمه بلال وقلت له مشكلة النقص وقلب لون الزيت .
قال طف السيارة وخلها نص ساعة ، وبعدها قال شغل وجلس عند شكمان السيارة . واشغل قال طف خلاص لقينا المشكلة !! وش هي طال عمرك : قال طلع دخان بسيط ماتشوفه الا مع التشغيل وينقطع وهذا جلد بلوف يبيلها تغيير وتنتهي المشكلة . وب1200 شغل يد بدون فك مكينة ونطلع الجلد بجهاز الزركون او زي كذا الاسم ناسيه .
المهم توكلت على الله ووقفت السيارة عنده وانا اخرط له جميع المشاكل من فضاوة الدريكسون ومن مشكلة الدودة ومن تهريبات وجه الكرتير ومره واحدة ينفض الموتر وبسم الله ماشاء الله طلعت من عنده وكاله يارب لك الحمد لله مشيت عليه 4000 آلاف لا قلب ولا نقص زيت وانصح اللي عنده نفس المشكلة لا يتردد ووالله ثم والله انها ليست من باب الدعاية او المعرفة لهذا الشخص او الورشة ولكن لكي لا يستعجل الواحد على موتره يوضبه ولا يبيعه والمشكلة بسيطة رآجي منكم الدعاء لي .
بعد إذن الإدارة والمشرف
اسم الورشة ( عالم المحرك)
رقم المهندس بلال / 0509109472
موقعها الرياض - الشفاء - شارع فتح مكه - ورشة رقم 280