منتدى استراحات زايد - للشباب استشاره ماليه وحلولها

..بسم الله الرحمن الرحيم..

السلام عليكم ورحمة الله وبركاته :

اخواني اعضاء ومشرفين المنتدى انا من اشد المتابعين للمنتدى وادري ان الموضوع ماله اي دخل في المنتدى لاكن مالقيت خيمه اجتماعيه او ماليه تختص في الموضوع اللى راح اطرحه وهو (( الضغوط الماليه الشهريه والحلول ))
مثل ايجار منزل او قرض بنكي او اقساط شهريه او رواتب عماله من خادمه او سائق او غيره .
طبعا اخوكم ومحدثكم عانيت كثير خاصه الحاجه للناس هي اللى ارغمتني اعيد النظر في مصروفاتي ويقول المثل >>>>>> الحاجه ام الاختراع
اللى حصل معي كانت على اقساط قرض بنكي واقساط سياره وايجار منزل وراتب خادمه ولا فيه راحه ولانوم ودائما احلم اني اسدد اللى على من الالتزامات المذكوره بعاليه وللاسف الفتره طويله حاولت ادور على حلول بسيطه ومريحه .
طبعا ياشباب الصافي لى من الراتب 4 الاف ريال فقط لاغير طبعا من غير الديون مثل ساهر .
المهم الترتيب العشوائي جربته ولم انجح لانه عشوائي
ومانخلى من المصاريف اللى مالها لزمه والمعروف عننا كسعوديين حياتنا مبعثره ونظامنا مبعثر لايوجد نظام ومصاريفنا زايده وكلها بدون لزمه يعني ليس لها اهميه
اول مابديت بالاتصالات الفواتير سددتها واتضح لى ان على اشتراكات تزيد في فاتورة الجوال ماطلبتها و اس تي سي ماقول الا الله يهديهم وثانيا الغيت التلفون الثابت ماله داعي مجرد ضياع ماااااااال والحين لازم اعيش على الضروري فقط واحرم نفسي من رفاهية الحياة .........
ياشباب والله انا ابغى افيد واستفيد واللى عنده مقترح او مر بتجربه وكلنا مانخلى من الضيقه الماليه يضيفها لنا ونفيد بعض . والحين راح اوضح لكم ترتيبي الشهري
الترتيب الشهري هو كالتالى :
اولا : والمهم : من 200 الى 300 ريال صدقه كل شهر
ثانيا : وهذا برضه مهم 500 ريال للوالده الله يحفظها لى ويخليلكم والديكم .
ثالثا : 600 ريال لثلاجة البيت اقصد فيها املى المطبخ من نعايم الله .
رابعا : 1500 ريال هذا مصروفي انا وعائلتي من اكل وشرب وبنزين للسياره فهنا كل شهر واول يوم في الراتب امر على مؤسست النقد من الساعه 8 صباحا الى الساعه 10 صباحا يستقبلون طلب صرف اي مبلغ سواء بغيت خمسات او مئات او خمسينات او عشرات وانا دائما اخد خمسات واشتري ضروف الرسائل من المكتبه ولازم يكون عدد الضروف 30 ضرف على عدد ايام الشهر وكل ضرف اسجل عليه تاريخ اليوم من 1 الى 30 واحط في كل ضرف خمسين ريال هذا مصورفي اليومي انا وعائلتي ما اخذ غيره مالنا الا هذا المبلغ والله تكفينا ولازم نعرف ان الوجبات كلها في البيت ماناكل من المطاعم الا اذا مر علينا كم يوم باقي فائض من المصروف اليومي اجمعه ونطلع نتمشى فيه .
والله يا اخوان انا مابي احد يمر بالتجربه اللى مريت فيها جدااااا سيئه سامحوني على الاطاله واي استفسار انا حاضر .
ولا ننسى الاستغفار

(( ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا
وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) ))

الله يوفق الجميع لما يحبه ويرضاه