هاذي سالفتي مع الخبز والحمار السلام عليكم ورحمة الله وبركاته اخواني واخواتي هاذي سالفتي مع الخبز والحمار من اول الخبز ثمان بريال وكان له اصول اللي يجي الاول يحط ملقحه اللي يحط بهن الخبز ثم الثاني والثالث ثم يقلبن الملاقح على شان اللي حط ملقحه الاول هو اللي يعبي الخبز وكنا نتواعد انا وبعض الاصدقاء الصبحيه وسواليف وقرق الى ناصل الفران ثمن تعال شف الزحمه والمعافر على شان تحط ملقحك استذهنت شوي وبديت اذا لقيت واحد اعرفه وقبلي بالسرا اقعد اسولف معه وشوي شوي الين اقوله اي عذر يجي على البال ثم يصدق المسكين واقوله خذ لي معك بريال بريالين ثم اطلع قبل ربعي وشلون ماوشلون ثم اقولهم شطاره فعدت كم يوم على هالحال ماخليت احد ماكذبت عليه الى ابو جيراننا ماخليته من ظمن اللي هكيت عليهم وكان عندنا واحد بالحاره اقشر يتوذى منه بليس وفيه طبع شين بلحيل انه بعض المرات يجي ( مأجر الدور الثاني ) والعاقل يفهم جيت هاك اليوم قلت لنفسي مابقي الا هالاقشر غدين اجرب معه وياخذ لي خبز معه ولى اقعد انتظر كل هالوقت ومادريت انه يعرف كل شي وطرق اللعب والكذب اللي اسويه المراد ماطول عليكم قلتله وياليتي ماقلتله ويجي ويناظرن والريحه اللهم ياكافي قال تبي خبز قلت ايه قال اكيد قلت ايه يوم ادخلن الماء قال هالحين ابشر ويلتفت علي بريال ولا ريالين وبصوت عالي كل اللي بالفران سمعوه وغدا وجهي اسود وبديت احمر وصفر ويعبي ملقحي بالخبز والناس تناظر ومنقهره قال واحد ياخي حنا قبله قال ادري قالوله اجل وراك تعبيله يوم شانت نفسه ويناظرهم يوم اسكتو كلهم ونا يالله ابلع ريقي واقول الله يستر من تاليه عبى بريالين لى قال خذ ملقحك وخبزك قلت لنفسي هو صدق يوم جيت اباخذ الملقح ويجي يمسك ايدي وهو رجال نشيط وانا بزر وعينك ماتشوف الا النور ودخل ايدي بالملقح والخبز بوسطه حار يكوي واصفط الملقح والخبز على ايدي يوم غدت ايدي تقل ريه وانا اصرخ واصيح وشلن واحلتن هناك انا والملقح والخبز وقالي ( ان رغبت فعاود ) واروح اركض والعيال يضحكون علي قلت ايه هين والله ماخليك واثر هالاقشر له حمار يروح عليه ويجي للسوق ويحمل عليه بعض الاشياء خاصة بالليل حقه وهاك المغربيه الاقشر جاين راكبن حماره وان وره اختله ابي فرصتن انغز الحمار لعله يطيح وينكسر فيه شييء علشان ابرد كبدي يوم دريت يوم طاحت هاك القاروره مليانه واجي والزم العاير مادريبه وبتل يمشي هو وحماره ونا اخذ القاروره قلت هالحين اللي جابك الله يوم صار الصبح له عادتن يروح للفران قبلنا من اللعانه قمت قبله واروح لم حوش الحمار الله يكرمكم وشوي شوي وهاديه وصل القاروره كله بثمه يوم مابقي الا يغني ومرت يرفع اذان ومرت يسدلهن وانا ميت من الضحك يوم دريت تقل صمعت صوت وانا اتغبى ويجي ويبرق بالحمار تقل انه يوراله انه فيه شيء ماهو طبيعي واناملبد واقول ياربي انه يركبه المراد ركب الرجال حر حر حر ولا حركه يمين شمال يوم كتبله الله الدبور ويمحطه مع بين اذانه ويلتفت الحمار ويصر اذانه اللهم ياكافي ( الظاهر انه يحسب نفسه طياره ترنيدو ) ويطير بالرجال اية حصان او سباق فرورسيه لان اللي فيه مهوب شوي وينحر هاك الجدار العروق طين ويكرف رجلين الرجال ويطير لشوك عاقول واللي يعرف شوك العاقول اللي تبطه تقل ملهوب بضو والحاصل اني بردت كبدي منه واظن الحمار الى هالحين يركض وطايرن بالرجال واسف على الاطاله وهالغيبه |
الساعة الآن 03:22 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir