جاشي تهيض بالغميض الدفيني=واندار هاجوسي يعيد الخفيات
يطوي شريطن لايذن ما يبيني=دارت به الاعوام شوطن ودورات
شين رجف بالبال يكوي كنيني=كي الوسم مرسوم في ورك خلفات
لدور الهاجس تزايد ونيني=وابديت من بين الخوافيت آهات
قافي رجس بين الحنايا سجيني=محتار بالي ما يريد العويصات
سليت حاسوسي لعله يزيني=واثره يداريني على غير مشهات
خله على رب الخلايق يعيني=ربن رفع بالكون سبع السماوات
خضبت جوفي من جميع السنيني=ولا صفا لي بالمشي غير سجات
وين الرفيق المستقيم الحسيني=يشيل من سري على غير مبدات
اصبحت من بين الهزايل سميني=وامسيت هزلانن ربيط السمينات
وابطيت محتارن وافرك جبيني=لجل قرارن من ثلاثة قرارات
اما دموعي تاضح بموق عيني=تنثر محاجرها على الخد عبرات
واعدي براس الطويله حزيني=مع كل نسناسن تجي سبعة ابيات
او اني اكشف ما يكنه ظنيني=وازيد غيري من جديد الدفينات
وابني على المكشوف لينه يزيني=وامشي نهايب بالنجود القصيات
او اني امضي مستقلن غبيني=وابقى مع الخافي حسايف وضيقات
واصفق على اليسرا براحة يميني=واقطف من الذكرا عزا دون شوفات
وحمدت ربي حمدت الشاكريني=وضحكت للدنيا على صايرن فات