منتدى استراحات زايد - سالفة الهدوء الذي يسبق العاصفه ( النبهاني )

https://encrypted-tbn1.gstatic.com/i...QfEOlEW-c-6U9D

حبايبي المكشاتيه يسعد لي اوقاتكم

وسامحونا على التقصير

وهذي سويلفه غديه تشفع لي عندكم بعض الشي

سنه من السنين كنا صغار يعني بالصفوف الاوليه وحنا فلاليح طلعت انا وعمٍ لي الله يرحمه ويسكنه جنات النعيم وابوي وامواتنا وامواتكم والمسلمين آمين ورحنا يم النخل ولقينا مجموعة حمير الله يكرمكم من اللي حجمهن صغير الخضر الشهب ماهن من البيض الكبار الحجم وهاديات نضربهن بالعصا نبي نقلعهن عن المزارع لكن مايتحركن مثل اللي يقول دفه وياطا رجلك حنا يوم شفنا هذا طبعهن قمنا وركب كل واحد منا حمار ونبيهن يتحركن لكن ما فيه فايده تقل بهن بلا واخذنا حول ربع ساعه على هالطريقه نضرب بالعصا و نرفسهن بالعرقوب مع بطونهن ولا يتحركن وبغفلة مني وبلحظه وحده يوم انطلقن

واتجهن صوب الضلع وحماري بعد انطلق معهن - اللي يسمعن يقول شاريه - المهم صارن خيل عقب هكالجمود اثر عمي نزل من حماره ونغزه وانطلق وانطلقن معه الباقيات والضعيف لله على واحد منهن يوم تغيرت احوالي عقب ما انا اضرب وارفس بالعرقوب صار قلبي اظرط القلوب والخوف غشان مثل ما يغشى الليل النهار والسبب وضعية الركوب تغيرت من الركض وصرت بدل ما انا فوق ظهره اصبحت على جنب معقد رجولي ومتمسك برقبته والضلع له بطين يعني اللي تحتي كله حصى واشوف الحصى من تحت ور ور ولا اقدر افلت رجولي لانه الا سلمت من الحصى ما سلمت من حافر الحمار وهذا انا على هالحاله متشعبط بهالحمار لا عادة عليه المهم عقب عشر دقايق من الركض تقريباً اعترض لنا شعيب وجاء الفرج لكن بقا الحافر اخاف يفري بطني لكن مالي الا افك رجولي واطيح وهن خالصات مايبن شي من التعب واللي صار اني طحت بالشعيب وسلمت الا من التدربي يمكن خمس قلبات وبقريح اماي سلمت من حافر هالماخوذ اللي شوي واصير خلخال برجله الى هالحين .

انتهت السالفه غفر الله لي ولكم وللمسلمين

محبكم

النبهاني