السلام عليكم ورحمة الله ،،
قصتي مع عشق الهدد بدأت من سنين لين الله يسر وشريت gx 2013 قير عادي وكنت في قمة السعادة ولله الحمد .. ولكن !!!
بعدها بفترة بسيطة بموسم الطيور (اخوكم من عشاق المقناص )
رحت ادوج بالشعبان بعد ما جهزت الجيب طبعاً بالتجهيزات المعروفة للمكشاتيين واهل القنص بما لا يقل عن عشرة الاف ريال طلعنا للمقناص
لاحظت أول مالاحظت ضعف عزم الموتر بالنفود خاصة بالطعوس اذا جيت مطلاع ارده ثاني يطيح عزمه ويوقف
عرفت بعدها ان الموديلات الجديدة الدعسة فيها الكترونية ( يعني التسارع يكون بالتدريج ) للحفاظ على للمكينة حسب مافهمت!
صرت اعتمد بالطلعات في النفود على الأول (طبعاً مع الدبل الخفيف والتنسيم) رغم الحنة القوية والضغط على 6 ..
رجعت للديرة (من سكان الرياض) مع الايام وروحة الدوام والجية بالزحمات
صرت شيئاً فشيئاً انزعج من الموتر بحكم القير عادي وزحمات الرياض لاتطاق
وزيادة على ذلك كلتشه ثقيل مرة والتغييرات مهيب سلسة لازم توازن بين التغييرات والا بيقعد يناتع
وفكرت اشتري صغيرة تماتيك مع الجيب وترددت كثير بالنسبة لموترين
زايد ان الجيب صارت سواقته غثيثة لا في بر ولا ديرة استشرت أكثر من واحد
وقالوا خذ لك 8 سلندر تماتيك عطي الله وماكنت مقتنع فيه الا بعد ماجربته ماشاءالله عزم وقوة
بعدها عزمت اني ابيع الهدد واخذ جيب تمااتيك بس احترت الحين بين موترين : جي اكس ار 8 سلندر2011 وفوق أو باترول سفاري فتك 4800 الشكل القديم طبعاً موديل 2014
هذي اللي رسيت عليها بعد عدد من الخيارات الكثيرة منها الفروشنر والـ اف جي والبرادو.

عطوني رايكم الله يجزاكم خير بالنسبة للتجربة مع الهدد وبالنسبة للموترين اللي محتار بينها
من ميزات وعيوب ( في المدينة والبر ) وآآسف على الإطالة وشكراً مقدما.