السلام عليكم

يالربع لا يخفى عليكم انتشار مرض السمنه في مجتمعنا السعودي و تعددت الاسباب

وانا يامحاتسيكم واحد منهم , و كلنا شباب و نكشت و نوسع الصدر لكن عندنا الكشته دائماً مرتبطه بالدبغ حتى الثماله

الواحد لا طلع و كشت و افتك من غثى الديره و ريح الراس يبدأ يتفنن بالاكل فطور و غداء و عشاء مافيه الا قوة دسم

وصلت إلى حد يالله يالله اشيل عفشي و بعدها افح بسبب اللياقه السيئه و زيادة الوزن .. علماً اني ماكنت سمين لكن فله الحجاج بزياده و ماتسوي ههههه في الديرة استراحات مع الشباب و دبغ و الكشتات دبغ و العزايم دبغ و مواسم الصيد دبغ و كل الدعوه دبغ و مدابغ

المهم مالكم بالطويله

عزمت اني اضع حد لهالامر لأني لو تساهلت بالامر بيزيد وزني اكثر و اكثر

فقلت لازم اغير كثير من العادات و اترك الاشياء الدسمه و السكريات

طبعاً من الشتاء الماضي 2012 - 2013 إلى الشتاء هذا 2014 نقصت 25 كيلو يالله لك الحمد و صار الوزن 100 و نطمح إلى 80 بأذن الله

طيب بتقول لي كيف اكشت وانا مسوي ريجيم .. واكثر الشباب و بعضهم من اخوياي لا كشت يقول يارجال اجازة من الريجيم كاشتين و فالينها و من الدبغ يرجع دبل وزنه في 3 ايام :d

* قبل لا تبدأ لابد من العزيمه والاصرار و حط قدامك هدف , اوزن نفسك بميزان الكتروني و صور وزنك بالجوال عشان يرسخ في بالك .. بدون عزيمه و اصرار ماراح تستفيد ومجربها قبلك

بتكلم عن الكشتات و بعدين نتطرق الى الاكل في البيت و الاستراحات , في الكشته انسى شيء اسمه رز .. الرز هذا هو اللي بلانا .. خذ لك صدور دجاج مثلج و شكل من الخضار بطاطس قرع كوسه باذنجان فلفل بارد و اغراض السلطه خيار جزر كزبرة بصل ابيض او اخضر او اللي يجوز لك و ليمون بالطبع
و كنسل شيء اسمه زيت .. استبدل كل الزيوت اللي معك بالعزبه بزيت زيتون وانا افضل زيت زيتون نادك لأنه متوفر في البقالات الكبيرة و تقدر تأخذه وانت بطريقك اما زيوت الزيتون اللي تنباع جراكل و عصره اولى فهي افضل اذا توفرت عندك في البيت من اول تشري لك مطارة و تعبيها من الزيت و خلها رفيقك اللي ماينزل من الموتر هههه

بالنسبه لاغراض الفطور حاول تبعد عن الكبده و المقلقل و خذ لك اشياء خفيفه جبن ابيض جبن حلوم و خيار قطعهن شرايح و خبز بر و شاهي مخدر و عليك بالعافيه

استبدل السكر في عزبتك بالمحليات الاخرى الخاصه بالدايت مثل سكر الذرة وغيرها فهي اقل سعرات بكثير

الغداء انت مخير بين مرقه خضار بدون اضافه صلصه و تقليل الملح و البهارات ماتضر حط اللي يجوز لك

او تتبل لك صدور دجاج و يكون معك اسياخ و تشويهن للغداء و تأكلها بدون خبز او مع خبزه بر وحده كافيه لكن المشوي مافيه مشكله لو تدبغ منه الى باتسر بدون خبز


العشاء الافضل يكون خفيف لا تكثر عشاء .. ادبغ لك في فواكه حزه العشاء و لحقها بزبادي قليل الدسم لو تحب


هذا النظام اللي انا امشي عليه مافيه تكليف و الاغراض هذي متوفرة مع اي واحد بيكشت او في البيت .. لأني لاحظت اغلب الريجيمات فيه اكلات مدري وشهن منين اجيبهن هههه فمشيت على هالنظام من راسي

و طبعاً عليك بالشاهي الاخضر بعد كل وجبه كوب واحد فقط لا تكثر منه .. و كثر من شرب الماء عب بطنك ماء عشان ماتحس بجوع

و كثر حركه .. عني انا جنب البيت فيه حديقه امشي فيها يومياً 2 كيلو

اما بالنسبه للاستراحات و البيت انا امشي على نفس نظامي في الكشتات الغداء يامرقه خضار ولا مشوي

* حاول تبعد قد ماتقدر عن اللحم ولو تتركه نهائياً فهو افضل و من صالحك ومافيه شيء مستحيل لو عرفت وش اضرار كثره اللحم
و نفس الشيء مع الدخل او الشحيمي ابعدت عنه نهائياً و الجميع يعرف وشلون الدهن في الدخل
و الآن نقصت حوالي 25 كيلو و وصل الوزن إلى 100 كيلو .. على انه يعتبر وزن زائد لكن حسيت بالخف في النفس و اللياقه صارت افضل من قبل
و الضغط عندي تحسن كنت اعاني من الضغط و الكوليسترول و الآن بفضل من الله افضل من قبل بكثير و إلى الآن باقي لنا 20 كيلو ننزلها و نصل إلى الوزن المثالي

شاركونا بالنقاش و دعواتكم لنا ..