منتدى استراحات زايد - عاجل .. إذا تحب الضبان ادخل لاهنت

السلام عليكم ورحمة الله وبركاته

اخواني الأعضاء انتم تعرفون البير وغطاه مايحتاج أقعد أنصح وأقول اتركوا الضب وخلوه في حاله يكفي اللي يصير فيه من مجازر وهو مايدري من وين يحصلها من الإنسان وإلا من الورل :confused:

قبل أمس رحت للمجمعة أدور السمان والجرجس والطيور المهاجرة اللي سمعت ان توها جايه شفت بلاوي والله لو تشوفون اللي شفته عذرتوني :(

لاحول ولاقوة إلا بالله جحور كثيرة غرقانه بالماء ومحفورة وترابها اعزكم الله ناعم يعني مالها الا كم يوم ولما قربت من واحد من الجحور شميت ريحه كريهة
شغلت الكشاف اليدوي في داخل الجحر ولقيت طرف عكرة ضب داخل
طلعت الضب واشوفه صويب في نحره وميت والدود الابيض يمشي فيه

جتني حالة نفسية سيئة هذا وهو توه مابعد شبع يصير فيه كذا أجل وشلون لو جت الكنّه وش بيصير؟

ولعلمكم يا أخوان أنا والله كنت من المدمنين عليها وكنت أصيدها في شهر 8 و10 و11 هجري

أنا هنا أكلم العاقلين أهل العقول الرزينه أما اللي عقولهم (.........) لا أشره عليهم والله يهديهم

نحن نحتاج فقط وعي ونشر ثقافة عن الحيوان المهدد بالإنقراض عشان نضمن تكاثره ووجوده في صحرائنا الجميلة

يا أخوان أنا أقترح عليكم أن أي شخص يشوف ضب قريب من السكن العمراني أو القرى ياخذه ويعتقه بعيد في الصحراء او البر

آسف كثرت كلامي وخير الكلام ماقل ودل وآسف على الإطالة :(