|
حل مشكلة التفتفة والطفية في الجمسات والشفرات وتوابعها من الأمريكي بالصور بسم الله الرحمن الرحيم أخواني المكشاتية السلام عليكم ورحمة الله وبركاته وبعد ليس من المعقول أن يشتكي كل أصحاب الجمسات والشفرات من الطرمبة كل يوم فالمشكلة بنسبة 80 % ليست منها من أشياء أخرى وبعض أصحاب الورش يعرفها ولكنهم يقولون طرمبة بنزين ويقول لك خلي السيارة عندنا وتعال بكرة خذه أو بعد 4 ساعات تحتاج شغل كثير ويقومون بإصلاح وترجع السيارة أحسن من أول وهاااااات فلوس والشفلة بسيطة جداً حصلت مشكلة لأحد زملائي معه يوكن 2002 يتفتف ويقل عزمه ويطفي أثناء مشي السيارة في خط طويل والمشكلة أنه يطفي المفتاح ويشغل وتشتغل عااااادي وتمشيه 15 كيلو وتجيها الحاله وتم طرح المشكلة على هذا الرابط قبل شهر تقريباً http://www.mekshat.com/vb/showthread.php?t=199755 يقول صاحبنا ماخلى محل فحص كمبوتر الا وذهب له ولا خلى ولا ورشه الا وذهب لها وبعضهم يقولون طرمبة بنزين 1400 ريال !!! والبعض الآخر يقولون حساس الكام والكرنك الحساس 150 ريال وشغل اليد 300 ريال !!! وأخر يقول الثلاجة تهرب هواء يبغالها وجه جديد فك وتركيب 400 ريال !!! وأخر يقول الكويلات والبواجي يبيلها تغير !!! وأستشارني قلت كلهم خرااااااااطين ولا عندهم سالفة ولم أقتنع بكلامهم الطرمبة إذا خربت تطفي السيارة ولا تشتغل الا إذا أخذت نصف ساعة تبريد أو طقيتها برجلك أسفل التانكي وأحياناً ماتشتغل وتحتاج سطحة لنقلها والكويلات والبواجي والثلاجة وحساسات الكرنك إذا خرب أحدها تفتف على طوووول ولا تنتهي التفتفة الا نادراً لكن سرعان ماتعود بسرعة قلت أسمع كلامي ونبدأ بالرخيص قبل الغالي أول شئ قسنا ضغط الطرمبة لقيته ضعيف غيرنا الصفاية صار ضغطها ممتااااز قلت عطني كتالوج السيارة حق بلدها بالأنقليزي طبعاً أستخدام أمريكي تصفحته بالأستراحة على رواقه أنا وهو لقيت مكتوب فيه بعض محركات الفورتك 5300 وليس كلها فيه محركات 5300 تختلف الي يجي في وسط أرقامها الهيكلية حرف z نوع البنزين الموصى به للمحركات هذه بالذات أوكتين 85 وإذا فيه أعلى منه مايضر إلى أوكتين 87 مافيه مشكلة !!!!! باقي المحركات عادي تقبل أي شئ قلت وش تعبي سياراتك قال 95 قلت الكتالوج يقول من 85 إلى 87 يعني الله لا يهينك حول إلى 91 التعبئة القادمة وهو أقرب شئ للموصى به حول الرجال للبنزين 91 قلت هاه بشر وش صار قال المشكلة لازالت بس أخف من أول بعد البنزين 91 صارت تطفي مرة أو مرتين أول تطفي 5 إلى 6 مرات في المشوار الواحد !!! قلنا حلو طيب هاتها لي الليلة في الأستراحة وهات معك معك منظف أيسي ديلكو بإذن الله إني لأطلع علتها غصب وراها وراها حتى تضبط ونظفت له الثروتل بفكه كاااامل خارج المحرك وهذه صورته http://www.7rkt.at/uploader/uploads/58fbd7a2d1.jpg قلت جربها وبإذن الله راح تضبط جربها قال لي السيارة فيها تحسن بسيط عن أول قبل التنظيف تتفتف وتطفي الآن تفتف ولا تطفي !!! قلنا حلو أنا وراها والزمن طويل فكينا الحساس العلوي للثروتل ولقيناه منتهي حركته ثقيلة والجديد حركته خفيفة غيرناه وهذه صورته http://www.mekshat.com/pix/upload01/...%20%287%29.jpg قلت له جرب السيارة ورد لي خبر جربها يومين يقول تحسنت عن أول صارت تتفتف وتطفي أحياناً بعد يومين 3 أيام أول تطفي كل مشوار !!! قلنا حلو والله أني وراها حتى أجيب علتها بإذن الله هاتها الليلة وهات معها بخاخ تنظيف الألكترونيات خاص بها مثل هذا الي بالصورة http://www.mekshat.com/pix/upload01/...%20%285%29.jpg قبل فك الحساس يجب فصل أصبع البطارية السالب وهذه صورة الحساس http://www.mekshat.com/pix/upload01/...%20%286%29.jpg فكيناه فوجدنا في الفيش حقه كربون لونه أبيض مع زرقه زي البودرة في فتحات الفيش والأسنان التي يشبك فيها في نفس الحساس قمت بتنظيف الفيش ببخاخ التنظيف وتركته حتى يجف وقمت بتنظيف أسنان الحساس نفسها زي المشط بورق صنفرة العادي وحكيته حتى تخلصت من طبقة الكربون الي تغطيه وأيضاً بخيت عليه من البخاخ حق تنظيف الالكترونيات حتى جف على مكان شبك الفيش وأيضاً في بطنه تجد 3 أسلاك صغيييييييرة جداً زي فتيلة اللمبة الغازية لا تلمسها بيدك وبالراحة عليها أثناء بخ البخاخ هذه صورة تقريبيه للأسلاك الصغيرة طبعاً الحساس لسيارة أخرى http://www.4x4wire.com/toyota/mainte...ires_dirty.jpg قلت له جربها ورد لي خبر راح الرجال وغاب عني 3 أيام قلت خلني أدق عليه وأشوف علومه هاااه ياولد وينك وكيف الموتر قال الله يجزاك بالخير الموتر ضبط كنها وكالة ماشاء الله تبارك الله وصرفية البنزين خفت وأنا الآن أكلمك من طريق المدينة المنورة القصيم رايح زيارة للمدينة قلت تاصل بالسلامة إن شاء الله ومع السلامة أخواني تذكروا عند مواجهة مشكلة في سياراتكم أن تبدوا بالرخيص قبل الغالي ولا تسلمون لحاكم للورش تدرون ليه لأن 99 % منهم عمالة سايبة وغير مؤهلة لصيانة السيارات وماشية معهم بالبركة أهم شئ كم يطلع من وراك يالسعودي واحد مرة يقولي تغير القماش 70 ريال قلت ليييييه قال أنتا سعودي حكومة زيادة راتب أنتا 10 % لا أريد منكم غير الدعاء لوالدي والسلام عليكم ورحمة الله وبركاته وحقوق الطبع والنشر محفوظة لمكشات |
| الساعة الآن 09:10 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir