|
ذكريات لن تمر مرور الكرام..قوافي بسم الله الرحمن الرحيم أخواني أخواتي السلام عليكم ورحمة الله وبركاته أسعد الله أوقاتكم بالخير والمسرات مانخطه اليوم ليست سالفه او موقف إنما أسطر من الماضي الجميل .. قابلت سيده كبيره بالسن لا تعرف بالضبط كم عمرها وتقول على ما أضن فوق 85 سنه أطال الله بعمرها.. كانت تحكي والحنين يملئ عينيها لزوجها رحمه الله تقول : زمان البنات الصغيرات يلبسن مخنق والبعض يسميه بخنق وكانت تلبسه وتطلع عند الباب تلعب مع البنات ،،وهو عباره عن قماش اسود مطرز الحواف وهو طويل ساترمثل: ،،،،،،،،،،،،،،،،،،،،،،،،،،،، تحكي كيف تزوجت ابو العيال وهذا حال كثيرات بذاك الزمن الجميل: كانت تلعب بعد صلاة العصر مع البنيات عند الباب ونادت عليها امها رحمها الله وطلبت منها تدخل للبيت وماتطلع اليوم وكانت بعمر 9 سنوات ،،تقول بكيت أو صحت لين انفضخ راسي ابي اطلع مع البنات !! قالت والدتها : هو فيه بنيه عرسها الليله وتطلع للسوق تلعب خلاص انتي الحين بتصيرين مرة فلان عرستس عقب العشاء .. مافيه مشاور مثل الان أو استعداد متعب ،، الامور سهالات وميسوره قبل كم يوم المعرس جاب صندوق خشب وهو المتعارف عليه : ،،،،،،،،،،،،،،،،،،، يكون فيه : قطع قماش للعروس من الزري وهو قماش افتقدناه الان غالبا من الهند ياتي وقماش عادي وعبايه وشيال او غطاوي والبعض يسميها غدفه وبعض الاقمشه اللتي تحتاجها العروس .. ويجي صندوق ثاني او بنفس الصندوق مجموعه من الهدايا لأهل العروس عباره عن بشوت رجاليه للوالد والعم والخال والجد كما فهمت منها.. وعبايات نسائيه ولفه كامله من الغطاوي وقماش وهذا يوزع على العمات والخالات والجدات كهدية العرس لهم.. والكلام عن لسانها : تقول تولمت بان جدلت امي شعري ولبستني ثوب جديد ولبست عباتي وتغطيت كل هذا تم قبل صلاة العشاء وتحكي ومن رأها يستغرب عيونها ورقرقة الدمع فيهم مب زعل بقدر ماهو حنين وحنين إلى أن تنتهي السطور ووالله والله لا تكفي لشرح مارئيت ولا أستطيع توصيله للقارئ.. صلو الرجال صلاة العشاء وجو للعرس وتعشو واكيد مافيه كلافه سمعت الطقاقات تطق: ،،،،،،،،،،،،،، عرفت ان المعرس وصل ،، تقول ذيك الساعه أختلطت الفرحه والخوف وبديت انتفض من الغريب القادم اللي هو زوجي او كما قالت :رجلي.. عن لسانها : قالت لي امي تسنعي يافلانه واقعدي بالربعه ولا تحركين ،،أكيد مافيه كنب ولا زفه ،،تقول وقعدت مثل ما وصتن امي وجا ابوي والمعرس وبارك لي وحب الوالد راسي وطلع من عندي ،،أحلى ما قالت عن لسانها: أحزنتني كلمة ابوي يوم قال قبل يطلع من الحجره اللي هي الغرفه: يافلانه انتي الحين بتطلعين من بيتي ولا عاد ابي تجين إلا ضيفه وهذا فلان هو ابوتس وأخوتس ورجلتس تقول وصاية ابوي خلاتني أخذ موقف من الحياة الجديده ،، لكن مع مرور الوقت ومرور الايام ،،فهمت ابوي وعرفت وش قصد من حتسيه .. نهاية الحتسي مع ام فلان انها بكت وماكنت ابيها تدمع لكن على ماقالت كان :نعم الزوج والصديق والحبيب وماخلاني احتاج ابوي او اخوي .. انتهى الحديث معها بعد تقبيل يداها اللتي خط بهما الزمن دروبه وترك أثره عليهما .. أخواني يمكن اللي كتبته ماله دخل بخيمة السوالف لكن عز علي اني اسمع عن وفاء وصدق احساس ان يمر مرور الكرام.. الله يحسن الاحوال لنا وللمسلمين اجمعين .. تحياتي وتقديري واحترامي ..قوافي.. |
| الساعة الآن 11:47 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir