يالله يا مروي عطش كل ضميان=يا رافعن سبعن ولا فيها خله
انت الذي جودك شمل كل جوعان=يا رازق الدبداب في غبتن له
يا مجرين موج البحر دون قبطان=يا جاعلن سفن البشر مركبن له
يا مبخرن من داخله بيض الامزان=وامكثفه بالكون وبلن تزله
يا منشين في داخله حوت ومرجان=يا رافعن بارض الوطا ساحلن له
يا باينن من فوق مرفوع الاكوان=يا ظاهرن يا قابض الكون كله
يا اولن ما قبله انسن ولا جان=يا اخرن ما بعده احدن يحله
يا قادرن يا قاهرن كل شيطان=يا قاذفن بالجو شهبن تعله
يا واحدن ما له مع فرادته ثان=ما له شريكن كل الاحيا تجله
يا سامعن دب النمل فوق صفيان=بالليلة الضلما سمع خطوتن له
يا محصين كل الخلايا بالابدان=يا حاسبن للقلب كم دقتن له
يا عالمن باللي قبل عصرنا كان=واللي يبي يصير بخفا مقبلن له
ياللي بنورك ينتقذ كل هيمان=يا عالمن دق الخوافي وجله
ارحم ثرا نجدن ترا منك الاحسان=ارحم اهاليها وشاتن وبله
حزومها صارت سوافي وريغان=وابيارها عابت بقلن وخله
قل الوبل عنها من ايام وازمان=وديانها غبرا وباير محله
الرمث قل وحسورت كل الاغصان=غدا هدبها بالسوافي متله
والطلح شاين فاقد الري ذويان=ما واقين عن واهج الشمس ظله
اوراقها يبست تقفتها الاشيان=عقب الضما صار الذعيذع يهله
الارض صفرا بالنفايد وسنفان=يالله يا رب السماوات حله
بغمامتن تمطر على كل ميدان=تمكث شهر فوق الوطا مستهله
هي جنة الدنيا وترا الحق ديان=والعبد ما له عن قضا الله مسله
ما قدر الله يبصره شوف الاعيان=ولا بد نسكن حفرتن مستقله