|
سالفة:الجحش وامه (أكرمكم الله)..قوافي بسم الله الرحمن الرحيم اخواني اخواتي حياكم الله ومرحباً بكم هذي السالفه قديمه ويمكن الله العالم لها 37سنه .. طلعنا البر حنا وخوالي بر قريب من البيت ولو رايحين مشي وصلنا لكن مدري وين كان .. معنا ولد خالي صغير بعمر12 سنه وماشاء الله عليه كان سمين ،،وتوه متعلم السواقه ومن طبينا البر وهو مكومنا بصحن الونيت وطاير يمين وشمال ،،وكل اللي بالصحن اصغر منه عمر هو أكبرنا.. مسرع والارض رمل وحصا لفت السياره وتصدم جحش صغير على جمب الطريق يمشي هو وامه ((أكرمكم الله))وقفنا نبي نشوف المدعوس ومن باب الاشراف حول كل اللي بالصندوق ولا عادة عليه من تحويله :eek::eek:.. السياره انعفج كبوته،، شوي والجحش نفظ غباره ولا كن جاه شي لكن ميب هذي البليه:D:D جت امه الحماره وبدت ترافس وتصبخ بالسياره وحنا مع الخفه جانا شلل ماقدر ولا واحد يرجع مكانه واقرب مالنه حدر الموتر وذي تفحط برى والضعيف ولد خالي أخذ مالذ وطاب من الترفيس والتشويت سمين وماقدر يتغبى لا حدر السياره ولا يرقى للصحن وما نسمع إلا: دردبب دردبب وهو يصارخ :eek::eek: وخروه عن وخروه عن:D ايه هين!!وخروه!! من المهبول اللي بيضحي بضلوعه ولا قدر يبعد إلا يوم جت تدور احد بالصحن ترفسه انحاش للغماره ،، عقب ترويعناأبعدت هي وجحشه وطلعنا من حدر الموتر وركبنا وصارت روسنا تدور كأنه على رمان بلي نخاف تجي لين سواقنا قاضي ما قدر يسوق ضلعه انكسر وتركاته،،قعدنا نحتري احد يجي ما جاء أحد ،،اللي جاء الحماره وجحشه حنا شفناه ولا ما شفناه ونطب من جديد على حدر الموتر تقل حقون الصاعقه ورجعت ترفس بالسياره والحمد لله ما ابطت ،،جاء خالي يدور دلته(ولده المرفوس) وتناقزنا تقل جراذي من الغبرات شايشه الشوش والعيون لين الحين تدور من الخوف: خال خال هما الحماااااره ....الخ تحياتي وتقديري واحترامي ..قوافي.. |
| الساعة الآن 06:54 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir