منتدى استراحات زايد - في سرمدي السهالي

أمس الضحى في سرمدي السهالي=دوخلا خالي ولافيه الأوناس
ماغيرأنا والمزهبه والدلالي=وجيب تيوتا للسفريرفع الراس
دفعتبه لأجل الطرب راس مالي=ولاحسب المشتاق ربحه والأفلاس
والحمد لله صارملكي وهيالي=كاش على المكتب ومشراه نوماس
أنا أشهدن الجيب لوكان غالي=اللي دفعبه قال يانفس لاباس
دقيت سلفه حين مادق بالي=في داخلي الروح دقات هوجاس
على الله المعبود رب الجلالي=مشيت لامدور ولاني بعساس
وشعاد لوقالوا غشاه الهبالي=نويت أنا وممشاي نوه على ساس
باغي طرب نفسي ونشوات حالي=والرزق عند اللي علم عد الأنفاس
رزقي على منشي حقوق الخيالي=والبعد به راحه ولا قرب الأبلاس
مامات بالخليان مطرود جالي=ولا عاش حي مقعده فية الساس
ومن خاف من مسرى بسود الليالي=ضو النهار أوحش إليا صرت منداس
ساروا سواد الليل غشم العيالي=اللي يدوسون الخطرتحت الأدماس
ماعندهم للضيق وقت ومجالي=يظهرلهم في حزة الضيق نبراس
البريجلا الهم لوكان كالي=لوكان في نفسك والأعماق غطاس
هاذاي في بيدا خلاوي إلحالي=نفضت عن نفسي دواخيل الأوجاس
أطلقت بالبيدا شوارد خيالي=ودونت زينات المثايل بقرطاس
في مهمه ماداج فيه الحلالي=بس أم سالم به إتهجرس إتهجراس
تلعب طرب متهنيه بالدلالي=تدللت بلحونها مثل الأجراس
طرْب الخفوق وجاب زين المثالي=من مهجة فيها الهواجيس غلاس
تضاربن بالبال عوج وعدالي=وخامر مداخيلي طواري ووسواس
وياماحلا الفنجال تحت الظلالي=لأونست من لمس الضرم كل لماس
من قلتة ماها قراح إزلالي=سويت فنجال دوى النوم وإنعاس
الأوله ماأشرب سريب التوالي=حمستها من قبل هذا بمحماس
سلم تراه إلطيبين الرجالي=كيف لهم بن اليمن ماهو الكاس
أنا إن قعدت أعد عمي وخالي=ماأحد حسبلي لوعليْ ثوب وإلباس
وحسبت حسباتي من أول أوتالي=عن كلمة تلحق على خلع الأضراس
وياهل المثل يامبعدين المدالي=المعذره كان المثل شذوانحاس
طاري تراه من الطواري طرالي=فتح مكانين الحشا وفك ترباس
بأرض خليه ماحواليْ والي=عنا غدا إبليس العورلاذ وإنلاس
سويتها قيفان قول ومقالي=من طق راسي قلتها وقست بقياس
وصلوا عدد ماناض برق الشمالي=وماناض قبْلي والرعد فيه رجاس
على النبي صلوا عداد الرمالي=واعداد مايجني الثمركل غراس