منتدى استراحات زايد - سالفة اقشر وحظه ينصر ( النبهاني )

السلام عليكم ورحمة الله وبركاته
والعذر والسموحه على التقصير ربعي ياهلي
هذي سالفة واحد دائم نفسه على راس خشمه كانوا اهله هكالوقت بدو يشدون وينزلون حسب مراعي ابلهم وغنمهم رفيقنا سمع عن ارامكوا وعمره بالطعش ومن يوم سمع على طول سافر يم الشرقيه والتحق بشركة ارامكو بس ما طول به من قشارته لانه مافيه احد الا وتهاوش هو واياه .. الرجل كثرت مشاكله لين طردته الشركه واخذله مده بالشرقيه وهو كل ما مسك له شغل تناقر له مع احد وبعدها يطرد من الشغل
ضاقت به الدنيا وحن لاهله وربعه لكن مامعه دراهم وفكر له بحيله وقام وشرا له شنطه من الشناط الاوله الحديد وملاه صواميل كبار وطقه بقفل ورجع لاهله ويوم وصل هلوا به ربعه وذبحوا له واكرموه وصار له قدر عندهم الرجال متغرب له مده وجاي ومعه شنطه ثقيله فيها حصيلة ثلاث سنين او اربع .
وعقب هالحفاوه خطب بنت عمه وتزوج واخذ له كم راس من احد ربعه وسوى وليمة العرس همن خلى شنطته عند زوجته ونكس للشرقيه ومثل ماصار له اول صار له تالي من قشارته وشين نفسه ونفس النتيجه ضاقت عليه الوسيعه
وهو قاعد هكاليوم له فوق نزاوه وقدامه البحر تلاطم امواجه مثل الافكار براسه تلاطم وبهاللحظه وقعت عينه على شيٍ يبلص ( انعكاس الضوء ) قام وراح لهاللي يبلص يوم وصل لقا كيس قماش صغير منشق وفيه حص لولو .
زوجته عقب ماراح من عنده بيومين او ثلاثه كسرت القفل ومالقت الا هالصواميل - اللي كبر كيلو الميزان من اول - وعلمت ابوه ودريوا كل ربعه وعرفوا انه ضحك عليهم ولسان حالهم يقول ( حنا بزران )
رفيقنا عقب ما لقى الكيس راح لسوق الديره يبي يبيع الحص .. اللي قال له بسبعه الاف واللي يقول بعشره اثر فيه رجال يشوفه قام واخذه على جنب وقال رح لراعي المحل اللي بالقرنه هو يبي يثمنه لك صح لانه ناصح وفعلا راح سلام عليكم السلام تشري الحص ياخوي قلب الحص راعي المحل وقال هذا يسوى حول التسعين الف ريال كان تبي تبيع فانا شراي قال الاقشر دراهمك والله يربحك
كيف لا وهكالوقت هذا المبلغ ثروه المهم باع الحص واخذ القريشات وراح شرا مثل الشنطه الاوله الحديد ام الصواميل وحط فيها ذهب وعطورات وما غلا من حاجات الحريم وعلى طول للديره يوم وصل والا الكل يتصدد عنه حتى مرته قابلته بكلمة سرحني والوجه من الوجه ابيض لكن ما رد عليه الا بقوله خوذي هالشنطه .. قالت هالنوبه وش فيها حصا والا جمش قال افتيحها يوم فتحت الشنطه وشافت اللي ماهو حصى ولا جمش تفتحت مناخره وتغير كل شي
وطلع من مرته وراح يم اللي شرا منه غنم العرس وأوفاه واكرمه ومر على عمه وراضاه
وقام الرجال وطنخ نفسه وشرا بعارين وبنى بيت مخومس وخلى النارفيه حيه
وما زال الى الان هذا طبعه وعايش مع معشوقته اللي هي بعارينه رغم كبر سنه
احسن الله لنا وله الخاتمه
انتهت السالفه غفر الله لي ولكم ولعامة المسلمين
محبكم
النبهاني