|
عاهدن ابوي واخبرتني بالسالفه الوالده حتى اعتبر من هذه الدنيا اخواني وأخواتي السلام عليكم ورحمة الله وبركاته هذه القصه لم اعرفها الا بعد وفاة ابي رحمه الله وكان قد اخذ عهدا على والدتي ان لاتبوح بها الا بعد مماته وتحديدا لي شخصيا والامر متروكا لها متى شاءت ان تخبرني لأنني كنت المقرب له من بين إخوتي وليس قصورا بهم لاكنه كان يعيش معي بالبيت وهو الاب والصديق والرفيق وكاتم أسراري وقد تعاهدنا انا وهو أن لايخفي احد سرا وكنا نتقاسم الهموم والافراح ومتاعب الدنيا سويا وذات مره من غير عادتها الواده طلبت مني ان اجلس معها بعد صلاة العشاء وذكرت انها تريدني بأمر هام وعادتي دائما كل يوم بعد صلاة المغرب اجلس معها ونشرب القهوه والشاهي فقلت طيب علمين هالحين وش الفرق واصرت الابعد العشاء قلت لها سمي وابشري بعد الصلاة جيت وسلمت وقبلت رأسها مثل كل مره فقالت سكر الباب ولا تخلي احد يجي ففعلت واخبرت اولادي بذالك قالت ياوليدي تدري الدنيا حياة وموت يوم والله اوجعن قلبي قلت يومه بعد عمر طويل لاتقولين هالهرج انشاء الله يومي قبل يومك فبكت و قالت ماقاله عبث ابوك ومادري وش تقصد وقالت لا تقاطعن اسمع وبعدين تكلم قلتله سمي قالت ابوك الله يغفرله حصله سالفه قبل يموت الملك عبالعزبز رحمة الله عليه او اول ماحكم الملك سعود رحمة الله علي الجميع اول سنه واخذ علي عهد اني ماقولك الا بعد وفاته كان ابوك له ارض بيضا وكبيره (يعني لم تزرع بعد ) وكانت زينه والارض طيبه وروض من احسن الاراضي للزراعة وكان عنده قرشين ماسكهم للزمن تعب عمره وقرر انه يزرع هالارض ويحط به كل مايملك وهاك الحين ماعنده الا اخوك سليمان وابراهيم رحمة الله عليهم والمسلمين اجمعين قام واشتغل وحط اللي عنده وكل جهده بهالمزرعه الى ان زانت وصارت تقل جنه ولحقه دين واجد المرا د جاه واحد قال يابو سليمان المزرعه للبيع ردعليه الوالد قاله نعم تواعد هوواياه بعد كم يوم وكان بداية الامرتخرج لجنة تثمين من الزراعه والاماره ومادري وشو الجهه الثالثه ماطول عليكم طلعو اللجنه وثمنو المزرعه بعشرين الف 20000 ريال وهذا مبلغ كبير جدا في ذاك الزمان يعادل الملايين الان وكتبو ورقه بينهم والشهود اللي وقع واللي بصم ومن عرضهم الوالد بصم لانه لايقرا ولا يكتب وقاله الشاري اسبوعين زمان والقروش عندك تقول انه يقول ماشالتن الدنيا من الفرح والله اني احس اني يالله المس الارض من الفرحه وجزء من هالفرحه علشان استر وجهي من الديانه اسبـــــــــــــــــــــــــــــــــــــــــــــــ ــــــــوع إسبـــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــوعين شهــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـر إشهـــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــرين ماجاه قروش وهو ينتظر تثمين المزرعه راح للي شراء المزرعه هلا ابو فلان وشلونك عساك طيب على قوله تقل الوجه معبس رد يسأله عن قروش تثمين المزرعه ومن عادته رحمه الله انه مايجرح خاطر احد تقول الواده قل ابو فلان انت ارسلت القروش مع احد او انت بحاجه رد عليه بغظب وقاله وشي فلوسه وشي حاجته قله ابوك قروش تثمين المزرعه قاله الظاهر يابو سليمان انك خرفت قروشك استلمته قرش ينطح قرش وجاي تبلانا بذا والله ان ماطلعت من المزرعه لجمع عليك الناس وشهدهم عليك وكان ماتعرف تقرا دور احد يقرالك قالي ابوك والله انه تقل لافعن مع وجهي ووضحت لي الصوره انهم هكو علي بحكم اني ماعرف اقراء واكتب رحت لجار لي وقلتله اقر لي هالورقه قال لي سم يابو سليمان مكتوب فيها نعم انا فلان ابن فلان قبضت مبلغ نقدي قدره 20000 ريال قيمة تثمين المزرعه الكائنه قال ابوك يسد يابو فلان وصلت جاى ابوك للبيت والى والله وجهه باين عليه الحزن والضيقه قلت له عسى ماشر قال رزق راح ورزق جاي وقبل لا أسأله عن المعنى قال لي فلانه هكو علي وبصومون على شي ماستلمته تقول الواده عرفت السالفه على طول قلتله يالله مقسوم خير حسبي الله ونعم الوكيل ومازاد وردد وراي حسبي الله ونعم الوكيل يوم دريت ويبدا يسأل عن البعيد والقريب وهذا وشلونه وسلمت على ام فلان وسئلتي عن جيراننا تقول امي فغضبت وقلتله حنا بحال وانت بحال تسأل عن الناس وانت على هالحال تقول الوالده والله اني استغربت منه على هالبرود وقعدت اسئله وحاكيه سو كذا سو كذا قلت الوالده تدري وش قالي ؟؟؟؟؟؟؟؟؟؟؟؟؟؟؟ تراك ابلشتينا قومي تراي ميت من الجوع او ماطبختي بعد ترا وراي نومه علشان ادور رزقكم الصبح بعده بكم يوم راح للمحكمه ورفع قضيه واثر اللجنه والشهود طابخينه سوا وقال للشيخ السالفه كله طلب الشيخ الخصوم والشهود الزبده قاله الشيخ يابو سليمان ماعندك مايثبت لاكن ماقدامكم الا حلف اليمين الغموس قال ابوك انا حلفت تقول الوالده على وصف ابوك للرجال الشاري والله اني اشوفه تقل نمله من المذله وقام وجهه يحمر ويصفر قاله ابوك ياشين لاتحلف يابو فلان تراه ماتسوى النار وتدري ياشيخ انا مهذري ويابو فلان انت واللي معك ياويلكم من واحد تتاقفون بين ايديه وش تتقوله اذا وقفت انا وياكم بين ايديه تراه هذا مهب الشيخ تقدر تغبي عليه وما كان من ابوك الا ان ضحك وقال نتحاسب بعدين. وتقول الواده وتقسم بالله العظيم انه ماهل شهر الا انهم بدار الحق الخصوم مع الشهود والاغرب من ذالك اني سألت الوادة عن اسمائهم ورجوتها كثيرا لتخبرني وكانت الاجابه هذا ماحرجني من ابوك وقال حقي اخذه بعدين وعلشان مايقول ولدي اللي هو انت اني غبيت عليه شيء من اسراري وحنا متعاهدين وقوليله ( الوعد عهد والرجال مخابر مهيب مضاهر والعيب بقولت افا) وعذرا على الاطاله وارجو ان تجدو فائدة من هذه القصه وتحياتي للجميع |
| الساعة الآن 01:55 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir