مايضيع حق وراه مطالب (راعي العجرا) السلام عليكم ورحمة الله وبركاته سالفه قديمه سمعتها من الشيبان قبل خمسين سنه يقولون ان فيه شايب دخل للسوق ياخذ بعض الاغراض للبيت وانتم خابرين من اول الحال مامن امور طيبه حتى يؤاجر على تحميلها يالله الفلوس جابت حقات المقاضي الرجال طلع من السوق مطفر مخابيه فاضيه العنكبوت تدري عن مخابي الفقير على طول تبني عشها بالمخباة تدري انه ماراح يدخل ايده عليها الا بعد حول متى مارزقه الله المهم يوم جاء الرجال يشيلها الا وذاك الحمالي اللي معه زبيل من كبره يشيل المقاضي والرجال والحمالي نشيط من كثر التحميل والشيل والحط جاء الحمالي للرجال قال حمالي ياعم قال لا وهو ماقال لا الامن الفقر ماعنده حق الحمالي قال خلني احملها ووديها للبيت قال يابن الحلال انا ابشيلها شوي شوي حتى اوصل للبيت قال الحمالي هات عنك الاغراض وياخذها ويحطها بالزبيل قال اللي يحي منك بركه يوم شالها ومشاء شوي قال ياعم وش عاد تبي تعطيني قال الرجال لاشي قال مايخالف مقبول وصلوا البيت ونزل الاغراض قال الرجال جزاك الله خير وبيض الله وجهك قال الحمال وجهك ابيض ياعم بس عطني اللي انت وعدتني فيه قال وش تبي قال انت تقول لاشي وانا قبلت هه عاد عجل علي عطني لاشي قال راعي البيت منين اجيب لك لاشي انا قصدي مانيب معطيك شي المهم تهاوشوا هذا عطني وهذا ماعندي تدخلوا الناس بينهم وفكوهم على اساس انهم يروحون للقاضي الفلاني يحكم بينهم والقاضي لاتحسبونه في محكمه و اوراق وسجلات القاضي يحكم اذا صارت هناك مشكله بالشهرين والثلاثه ماجته قضيه جالس في بينه او مبسطه او عند غنمه راحوا للقاضي في بيته وحكوا عليه سالفه النزاع بينهم قال القاضي للرجال انت صحيح قلت ابعطيك لاشي قال نعم قال وانت يالحمالي قبلت في لاشي قال نعم قال القاضي للحمالي رح وارفع طرف الزوليه وخذ اللي تحتها فرح الحمالي توقع ان تحت الزوليه شي طيب رفع الحمالي الزوليه ومالقى شي قال الغاضي هه وش لقيت قال الحمالي لاشي قال اقاضي يالله خذه وانقلع لاعاد اشوف رقعت وجهك وصلك حقك كامل نزل الحمالي الزوليه وفتح الباب وطلع وهو يقول مايضيع حق وراه مطالب انتهت السالفه وقبل الختام ... سبحانك اللهم وبحمدك لا اله الاانت استغفرك واتوب اليه مع تحيات اخوكم راعي العجرا طاشكند بروكسل |
الساعة الآن 05:43 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir