< < < < ( تعنيت وقابلت خافق الريش ) > > > > السلام عليكم ورحمة الله وبركاته . اليوم اخر ايام معرض ابوظبي للصيد والفروسيه 7/9/2013 ذهبت الى المعرض وبحثت عن خاق الريش وقال واحد محله هناك , وصلت المحل . سألت : وين ابوسعود ؟ نادى عليه العامل ,. قال : مرحبا انت ابوسعود : قال نعم . ماشاء الله طيورك كثيره . . . لم اتأكد هل هو خافق الريش ام غيره , رجل مربوع القامه يلبس نظارات حليق الدقن يرد على الزبائن بابتسامه خفيفه كان المكان يعج بالزبائن وكانت طيوره في حدود العشره منها التبوع ومنها الفروخ وفيها قرناس 87% قال لأحد الزبائن هذا قرناس ثالث مزرعته بروفالكون ماقنص العام . . . اخذته على جنب قال انا ابوسعود خافق الريش ! مع ابتسامه عريضه . قلت له : انا ابوماجد ( قلب ذيب ) قال : اهلا وسهلا كثير سألوني عنك وسعيد باني شفتك . قلت له : شو موضوع مكشات وقضية الطير ؟ جلسنا على جنب وبدأ في الحديث . . . انا يابوماجد وسيط طيور بعت الكثير وعندي الكثير من الاصدقاء واكثرهم في السعوديه , طلاع جاء وشاف الطير بعينه ودعينا الطير , وماقبضناه الا بعد صلاة العشا ,وهو شاف الطير وشاف طياره والحق ( اني قلت له الطير يرغب الحمام ) هذي الحاجه الوحيده اللي انا غلطان فيها ! الرجال بعد ماأخذ الطير وبعد مده اتصل يقول الطير مايعرف الكروان ؟ قلت له انا كلامي من كلام راعيه . قال لي : ابغى اكلم راعيه راشد , عطيته جوال راشد لكن راشد كونه يعمل في الدوريات لم يستطع يرد عليه . قام يتصل في وبيعث رسايل قلت له الطير له وزن اذا ماوصلته الوزن المحدد مابيهد على الكراوين . ماادري كيف تعامل مع الطير , ولاادري كيف هده يمكن الطير متعشي او وزنه ناقص او خايف . . . الله اعلم . قلته : انت شارط الطير صايد الكروان . قال : من كلام راعيه . قلت والحل : قال انا بينت وجهة نظري ومن الردود ارى ان هناك تحامل علي بعضهم يكذبني وبعضهم يطلب من ادارة مكشات الغاء عضويتي . هناك من اصدر احكام مسبقه ولم يتأكد من الحقيقه . انا الان مرهق ومرات ماأقدر ارد عليهم الاالساعه 2 ليلا , وفيه مجموعه انحازت معه ؟ والامر اللي متعجب منه ( شمعنى طرح الموضوع الان ؟؟) القصد تشويه سمعتي ! لكن انا معروف ولي معارفي ومن يتعاملون معي , وبأذن الله سوف يبان صدق تعاملي مع الاخرين . . . كان اذان المغرب يقترب واستأذنته في الذهاب الى الصلاه قال : بعد انا رايح اصلي . . . ذهبت على ان اعاود الاتصال معه لاحقا واجرب الرجال عن قرب , لم اصل الى الحقيقه , واعتقد ان الحقيقه سوف تكون غائبه لمده طويله . ذلك هو عالم بيع الطيور فيه اختلاف في الفهم والوعي والادراك واستبيان الحقيقه , والرابح هو المسامح وسيجدها عند خالقه باذن الله . |
الساعة الآن 06:20 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir