منتدى استراحات زايد - هل ممكن نحضى ببيئة نظيفة لنا وللأجيال من بعدنا..

السلام عليكم ورحمة الله وبركاته

يقول الشاعر العملاق عبد الله بن نايف بن عون :

الوقت ما تاليه معنا بزاين ** والبر في حادور من حين لا حـــين
ادناه مليان كراتين فـــاين ** واقصاه ضاق وضيقوبه هل الضين

إخواني في بدايه الأمر لربما اضطر لإستخدام مصطلحات (شوارع) من شي شفته ولا زلت اشوفه وسوف اشوفه وسوف تشوفونه وعيالي وعيالكم راح يشوفونه ما لم نستدرك (الخطاء) ونشيل ونتحمل المسؤولية ونتمسك بتعاليم الدين الحنيف ودعوكم من الكلام الحديث الجديد (خلكم بيئيين) (خلكم حضاريين) فقط طبقو تعاليم دينكم (النظافة من الإيمان) .

انا من مرتادي البر في اوقات الصيد حالي حال الأغلبية منكم وقدر الله علي وطلعت لأحد الشعبان العملاقة في نجد العذية والمثل يقول (لا كذبت سند) ألا وهو شعيب السهل ومن منا لا يعرفه .

تمشيت بالسهل لغرض صيد الدخل والحمد الله من الله علينا بصيد طيب وجلست يومين من احلا الأيام واخذت عصاي في احد الأوقات ورحت اتمشى بين الطلاح وتلوح لي ذيك الطلحه الكبيرة جدآ والخضراء لدرجة اني قمت ادربل عليها واقول كم سيارة ممكن تستظل بظلالها يا ترى ؟ وقلت في نفسي ملزوم اجيب الربع تحتها لأنها اكبر من طلحتنا بثلاثة اضعاف بدون مبالغة وعشان ما افشل نفسي قررت اواصل المسير لين اوصلها والله يعينني على الحر اجارنا الله وإياكم من عذاب جهنم .
وكلما اقتربت منها إزداد إستغرابي لأن ما تحتها (شلة) او جماعه وقلت في نفسي الله لا يعمينا الشعيب مليان اوادم ليش ما احد جلس تحتها ويوم وصلت عرفت السبب !!!

الحقيقة وجت تحتها ما لا يليق ذكره تقول ثاير فيها لغم من كثر المخلفات وهالمنظر اكيد تكرر معكم والسؤال إلى متى ؟
إلى متى الإستهتار ؟
إلى متى الأنانية ؟
إلى متى التعدي على الأشجار ؟
إلى متى نجلس مكتوفي الأيدي ؟
إلى متى نسمح ولا نعاقب من يلوث البيئة؟

إلى الله المشتكى إلى الله المشتكى نسأله الله الهدايه لكل متهاون ...