السلام عليگم ورحمة الله وبرگاته


وكل عام وانتم والامة الاسلامية بالف خير حبيت انقلگم ذا القصيدة


حر وحش له ماكر في طرف جال
طرح الخلا بكر من طيور سيبير


كاشف نحر وارقط حمر يشعل اشعال
شدد ثلاث وفيه ريش ن مغاتير


ماهوب ممسوح العمد دقه قلال
مودع شليله كالبرد فيه تدوير


سبعة عشر طول السبب منكبه طال
والعرض زايد قايسينه بتمتير


وسره وعار الريش ووصوفه جزال
وريشه دقاق وما بريشه دعاثير


والراس وافي برقعه كود تفصال
وادرع لسان وفي حجاجه تكاشير


اقطم وسيع العين والراس فنجال
والشدق بيين مع وساع المناخير


وجه صبوح افدع ابد ماله امثال
مابه دعوج بس لواحظ ولا غير


جثل اللحم يتعب على الكف نقال
له عاتق يعجب جميع الصقاقير


متفهق الجنحان للخرب عيال
مع معلف واسع ثنادن مزابير


حرش كفوفه كبس وفخوذه جلال
افجح هجر ومسرول ن ساقه قصير


عكف المخالب تودع الدم شلال
حداد غرزاته سوات المسامير


ضرب الصوايد لبرق للريش غربال
لاهواء عليها كسر العضم تكسير


فعل ن وطبع ن شوفته تشرح البال
يردف على فروخ الشياهين والجير


كنه على التكيه ليا شيف رجال
راكد امين ما بطبعه تناكير


ماهوب كفاخ ليا شاف الازوال
ريشه سلم مابه ثلوم وتوسير


صايد فصيل وقلت اسميه فصال
وان فرعوبه شافها واهمل السير


ماهوب متردد ولاهوب جفال
جاها كما ورد الضوامي على البير


مثل الشجاع بمقدم الجيش خيال
يضحك ليا صكو عليه الطوابير


هذي وصوف الطير ياطيب الفال
وصف دقيق ن واضح للصقاقير


والطير له في داخل القلب منزال
اغليه وله عندي معزه وتقدير


تمت وصلى الله على سيد الاجيال
محمد اللي بشر الناس بالخير


منقول وسلامتكم