عوده لكم مع نجم سهيل
 

راحت ثلاث سنين ما صغت ياسهيل
فيك القوافي والبيوت الجزيله

اسف علي التقصير من دون تقليل
قدرك مادام اللي بقا كم ليله

وتطلع وتتسابق عليك الهلاهيل
من كل صقارٍ برا القيض حيله

ويقصر نهار الحر عن بارد الليل
لا ذعذع الغربي بريحٍ تشيله

ويزين معك الليل والبن والهيل
وتشفي معك كل النفوس العليله.

وانا اتمني في جديد التماثيل
فرخٍ قطامي من حرارٍ اصيله

ابيه صافي لون ضافي سراويل
جثل المناكب والموامي طويله

عاري هجر ومرخمات الفناجيل
من لون راسه والملامس جليله.

ولونه كما الغرمول لا رشه السيل
ودق الثريا سايحه في شليله

صافي حمر مافيه شكه وتحليل
طلق العمد تشهد وتثبت دليله

عاتق ومفرع وجه بالوصف لا قيل
وجه الغضب او قيل مافيه حيله

وبكفوفه الثنتين للموت تهويل
ياكم روحٍ من عطبها قتيله.

له خبرته بالطرد راهي وحلحيل
يصمل بطرده لين يشفي غليله

طرح الشبك ماهو نتيجة تحاليل
فصيلة منا ومنا فصيله

هذي طرات العمر والشف والميل
وراع الولع والطير خل وخليله

يقوله اللي بالشعر يوزن الشيل
واليا بدع ماجاب كسر وهزيله.

واسف علي التقصير بالوصف ياسهيل
مدام باقي لطلعتك كم ليله

مطلق الفزران

اهداء لنجم سهيل



مغاليس
__________________

سبحان الله وبحمده سبحان الله العظيم