ابي شوركم بشراء عدة للكشتات + خيمة .
 

السلام عليكم

قبل سنتين قدر الله علي وتزوجت :D
وتلخبطت في كل شي في حياتي دوامي طويل وديوني صارت جبال .

ومر علي سنتين بدون كشته :eek: بسبب الاهل + ديون الزواج + ما كان عندي سيارة دفع رباعي.

صرت اطلع للمخططات وللحدائق بس خلاص تعبت نفسياً .

ماتغير الوضع الحين كثير بس دبرت لي سيارة دفع رباعي , لأني إذا ما طلعت من هالزفلت مدري وش بيجيني .

طبعاً بتكون خفيفة خصوصاً مع وجود العائلة .

لكن ما ادري وش اسوي ابي أبدأ من أول وجديد.

وش اشتري محتار , ابي عدة للطبخ والجلوس وكل شي وبصراحة مدري كيف أبدأ . ولاعندي خبرة كنت أطلع مع الشباب وما ادري وش يستعملون ومن وين يشترون هالأغراض حدي رواق وذري وحطب .

ماعندي غير رواق و منقد للشوي ومدة للجلوس ومراكي وفراش نوم نفر ونص شريته من الغرابي الشتاء الماضي وما أستعملته .

وبالنسبة للخيمة هل 2.40 مناسبة للشخصين وطفل او طفلين. للجلوس والنوم ؟ وهل المضلة مهمة ؟؟ لان الي فيها مضلة اقل شي 2.60 ومفصلات مرتفعة تفرق بالقيمة 700 ريال عن ال2.40 أكواع منخفضة بدون مضلة .

شاكراً لكم .